Psom 27 - Kreol Morisyen OT Portions

Lesegner limem mo Sover

Enn Psom David.

¹ LESEGNER, limem mo lalimier; limem mo sover. Mo pena pou per personn. LESEGNER protez mwa kont tou danze; mo pena pou tranble devan personn.

² Kan move dimoun atak mwa pou fer mwa ditor, mo bann adverser e bann ennmi zot ki kogne; zot ki tonbe.

³ Mem kan enn larme antour mwa mo leker pa per nannye; mem si lager deklare kont mwa mo lafwa res ferm.

⁴ Mo finn dimann LESEGNER enn sel zafer; zis enn zafer, pa plis: permet mwa viv dan lakaz LESEGNER pou touzour; permet mwa get avek admirasion magnifisans LESEGNER; e dimann li gid mwa.

⁵ Kan letan dir vini li pou gard mwa ansekirite dan so Tanp; li pou kasiet mwa anba so latant; li pou plas mwa ansekirite dan enn landrwa bien ot.

⁶ Lerla mo pou gagn laviktwar lor mo ennmi; dan lazwa san limit mo pou ofer sakrifis dan so Tanp e mo pou sant louanz e zoue lamizik pou LESEGNER.

⁷ Ekout mwa SEGNER, letan mo apel twa; ena pitie pou mwa, reponn mwa.

⁸ Mo leker dir, “Tourn twa ver LESEGNER!” Ver tomem ki mo tourne pou adore, SEGNER.

⁹ Pa tourn to ledo ar mwa! Pa abandonn to serviter fidel avek koler; to finn toultan soutenir mwa; pa rezet mwa, pa abandonn mwa, Bondie mo Sover.

¹⁰ Mama-papa kapav abandonn zanfan me LESEGNER li pou toultan akeyir mwa, so zanfan.

¹¹ Montre mwa SEGNER, seki bizin fer; ed mwa pran bon sime ki peyna obstak, parski mo ena boukou ennmi.

¹² Pa larg mwa dan grif mo ennmi ki servi mansonz bann fos temwin pou menas mwa avek violans.

¹³ Mwa mo sir mo pou trouv bonte LESEGNER isi dan sa lavi la.

¹⁴ Fer konfians LESEGNER. Gard lafwa, pa perdi kouraz. Atann LESEGNER ar konfians.