Psom 24 - Kreol Morisyen OT Portions

Enn gran Lerwa

Enn Psom David.

¹ Lemond ek tou seki ena ladan zot pou LESEGNER; later ek tou seki viv lor la zot‘si pou li.

² Li finn konstrir tousala lor lak souterin; li finn etabli fondasion dan lili losean.

³ Kisannla gagn drwa mont lor montagn LESEGNER? Kisannla gagn drwa rant dan so Tanp sakre?

⁴ Bann ki zot lame prop ek zot leker kler, ki pa priye idol e ki pa fer promes dan vid.

⁵ Dimoun prop gagn benediksion LESEGNER; Bondie so Sover pou rekonet ki li zis.

⁶ Sa bann bon dimoun la zot mars ver Bondie e zot viv dan prezans Bondie ki Zakob adore.

⁷ Bann portay! Ouver angran zot batan. Ouver bann batan laport ansien, pou les Lerwa dan tou so laglwar rantre.

⁸ Kisannla sa gran Lerwa la? LESEGNER, for ek pwisan, Limem SEGNER ki viktorye dan konba.

⁹ Bann portay! Ouver angran zot batan. Ouver bann batan laport ansien, pou les Lerwa viktorye rantre.

¹⁰ Kisannla sa gran Lerwa la? LESEGNER, ki pli pwisan ki tou. Limem Lerwa ki ena tou laglwar!