Psom 23 - Kreol Morisyen OT Portions

Lesegner limem mo Berze

Enn Psom David.

¹ LESEGNER limem mo berze; akoz sa mo pa mank nannye.

² Li amenn mwa repoze dan patiraz lerb tann; li gid mwa kot rwiso dilo trankil,

³ pou mo regagn lavi; li kondir mwa lor bon sime pou loner so nom.

⁴ Mem kan mo travers vale bien som, parey lamor nannye pa fer mwa per parski to toultan la koste ar mwa, ar to baton berze to protez mwa.

⁵ To dres latab pou mwa divan mo bann adverser. To vers delwil parfime lor mo latet pou resevwar mwa ar loner, e to plin mo koup ziska li deborde.

⁶ Mo kone ki to bonte ek to lamour pou akonpagn mwa toulezour mo lavi, e mo pou res dan lakaz mo SEGNER osi lontan ki mo viv.