Psom 19 - Kreol Morisyen OT Portions

Laglwar ek Lalwa Bondie

Pou sef koral. Enn Psom David.

¹ Lesiel revel klerman laglwar Bondie! Travay so lame proklame par zetwal lao dan lesiel.

² Sak zour rakont sa lot zour ki vini; lanwit deklar lot lanwit sa nouvel la.

³ Pena diskour, pena parol pou dir, pa tann okenn lavwa.

⁴ Malgre sa zot mesaz travers partou; zot lavwa vwayaz ziska finfon later. Dan lesiel Bondie finn ranz enn lakaz pou soley;

⁵ kouma nouvo marye, li leve, li sorti dan lasam, kouma enn atlet anform li galoup so parkour ziska aswar.

⁶ Li komans depi les, li al ziska lwes, so saler sof partou.

⁷ Lalwa LESEGNER li parfe; li donn nouvo lafors pou viv. Temwaniaz LESEGNER li valab toultan, li donn sazes bann dimoun sinp.

⁸ Instriksion LESEGNER li drwat ek zis, li ranpli leker ar lazwa. Komandman LESEGNER bien kler li ouver nou lizie.

⁹ Respe pou LESEGNER li bien bon, li valab pou toultan. Zizman ki LESEGNER rande li vre, e zot touzour zis.

¹⁰ Zot pli presie ki lor, ki boukou lor rafine; li ena plis douser ki dimiel pli dou ki dimiel ki fek koule.

¹¹ Zot donn mwa, to serviter, gran konesans e kan mo obeyir zot mo gagn rekonpans.

¹² Kisannla kapav trouv so prop febles? Pardonn mwa bann erer ki mo pa pe trouve.

¹³ Protez mwa to serviter kont larogans; ki sa pa dominn mwa. Lerla mo pou san repros, e inosan konsernan bann move ditor.

¹⁴ Fer ki parol mo labous e meditasion mo leker zot akseptab devan twa, O SEGNER, tomem mo protekter ek mo liberater.