Psom 18 - Kreol Morisyen OT Portions

Sante laviktwar

Pou sef koral. Enn Psom David, serviter LESEGNER. Li ti sant bann parol sa santela letan LESEGNER ti delivre li de so bann ennmi e depi lame Sail.

¹ Mo kontan twa, SEGNER! Tomem mo lafors.

² LESEGNER, limem mo sitadel, mo veritab fortres, mo liberater, mo Bondie, sitadel kot mo santi mwa ansekirite, boukliye ki protez mwa, ki defann mwa, ki sov mwa.

³ Mo apel LESEGNER osekour, ki merit tou louanz! E li delivre mwa kont mo ennmi.

⁴ Danze lamor ti pe fer mo letour; gro vag destriksion ti pe roul ver mwa.

⁵ Danze lamor ti antour mwa, bann tom ti pare pou aval mwa.

⁶ Dan mo detres mo kriye LESEGNER, mo ti dimann mo Bondie vinn ed mwa. Depi dan so tanp li ti tann mo soufrans; mo lavwa finn ariv ziska li.

⁷ Lerla later ti tranble ek bouze; fondasion montagn sakouye ek vibre parski Bondie ti bien ankoler.

⁸ Lafime ti pe sorti par so nene; depi so labous, laflam ki griy partou, ti akonpanye par labrez anflame.

⁹ Li ti deroul lesiel kouma enn tapi, e li desann lor later lor enn gro niaz nwar.

¹⁰ Li ti mont lor enn seribin, li ti anvole, li ti plane lor lezel divan.

¹¹ Enn lanvlop marenwar ti kasiet li e bann niaz nwar epe gonfle ar dilo ti kouver li.

¹² Enn lalimier bien for ti divan li, lagrel ek labrez anflame ki ti pers bann niaz.

¹³ Lavwa LESEGNER ti eklate kouma loraz e lavwa Bondie Pli Lao ti rezone partou.

¹⁴ Li lans so bann fles e so bann ennmi sove, ar enn filwar zekler li ti fer zot galoup andezord, disparet.

¹⁵ SEGNER, to koler kouma siklonn, ler to exprim to menas e to laraz li fer fon lamer paret, li met fondasion later touni.

¹⁶ LESEGNER ti desann net depi lao e ti tir mwa depi kot mo ti pe nwaye.

¹⁷ Li ti liber mwa, kas mo lasenn, parski mo ennmi ti tro for, mo adverser tro pwisan.

¹⁸ Zot ti profit mo maler pou atak mwa me LESEGNER ti vinn defann mwa.

¹⁹ Li ti tir mwa dan danze, ti liber mwa, e ti sov mwa parski li ti kontan mwa.

²⁰ LESEGNER rekonpans mwa dapre mo drwatir; li beni mwa parski mo lame prop.

²¹ Mo finn touzour swiv sime LESEGNER e zame mo pa finn tourn mo ledo ar mo Bondie.

²² So bann lalwa toultan divan mwa, e mo pa finn dezobeyir so bann instriksion.

²³ Li kone ki peyna okenn blam kont mwa, e ki mo pran boukou prekosion pou pa fer pese.

²⁴ Li rekonpans mwa dapre mo drwatir me osi parski li trouve ki mo lame prop.

²⁵ SEGNER to fidel ar seki montre limem fidel; to montre to san repros ar seki san repros;

²⁶ Ar seki sinser, to montre ki to sinser, me ar move dimoun to montre to pli malin.

²⁷ To sov ti-dimoun ki konn imiliasion, to abes bann ki ranpli ar lorgey.

²⁸ SEGNER mo Bondie, to lalimier mo lavi, to ekler mwa dan teneb.

²⁹ Grasa twa mo kapav fer fas enn latroup gerye; ar to lafors mo kapav fransi enn miray.

³⁰ Sa Bondie la, li plis ki parfe; LESEGNER so parol ena valer e kouma enn boukliye li protez seki rod so proteksion.

³¹ LESEGNER tousel ki Bondie! Bondie tousel kapav defann nou.

³² Limem ki donn mwa lafors e montre mwa sime ki sir.

³³ Kouma serf dan vale ek lor montagn li montre mwa galoupe san tonbe.

³⁴ Li antrenn mwa pou konba, mo lebra kapav redi enn ark an bronz.

³⁵ To finn donn mwa to boukliye ki sov mwa; to lame drwat finn soutenir mwa; to bonte finn rann mwa for.

³⁶ To finn donn mwa plis lespas pou mo kapav avanse, sa finn anpes mwa tonbe.

³⁷ Mo finn pourswiv mo ennmi ziska mo finn zwenn zot; mo finn lager ar zot ziska mo finn fini zot;

³⁸ mo finn koup-koup zot, fors zot larg lekor; e kot mo lipie, zot tonbe dan ladefet.

³⁹ To nouri mo kouraz pou konba, pou fer mo ennmi pliye devan mwa.

⁴⁰ To fer mo ennmi sove ale; mo‘nn detrir mo bann adverser.

⁴¹ Zot dimann sekour me personn pa tann zot; zot rod koudme LESEGNER me li pa reponn zot;

⁴² mo kraz zot ziska zot vinn lapousier ki divan sarye ale; mo kraz zot kouma labou lor sime.

⁴³ To finn protez mwa kont dimoun rebel, e to finn swazir mwa kouma lerwa diferan nasion; dimoun ki mo pa ti kone, zordi form parti lepep ki mo pe dirize.

⁴⁴ Pep etranze akeyir mwa kouma zot lerwa; kouma zot tann mo koze, zot aksepte obeyir mwa;

⁴⁵ zot kouraz fonn; zot tranble letan zot kit zot fortres.

⁴⁶ Mo SEGNER li vivan! Mo loue mo Bondie solid! Mo loue Bondie ki finn sov mwa!

⁴⁷ Limem ki donn mwa laviktwar kont mo ennmi; Limem ki fors bann lezot nasion aksepte mo regn;

⁴⁸ tomem ki protez mwa kont ennmi. To finn ed mwa ena viktwar lor bann adverser, e to finn delivre mwa kont dimoun violan.

⁴⁹ Pou tousala, SEGNER, mo pou dir to grander parmi bann nasion ki pa konn twa; e for-for mo pou sant to louanz.

⁵⁰ Bondie donn laviktwar lerwa ki li finn swazir; li montre so gran lamour infini pou lerwa ki li finn konsakre, pou David ek so desandan pou toultan.