Psom 148 - Kreol Morisyen OT Portions

Liniver net selebre Bondie

¹ Alelouya! Loue LESEGNER depi lesiel, loue li, depi lao laba dan oter.

² Loue li, zot ki so bann anz; loue li, so larme divinn.

³ Soley ek lalinn, zot bizin loue li! Bann zetwal ki briye, zot bizin loue li!

⁴ Bann lesiel pli lao ki lesiel, bann dilo pli lao ki lesiel, zot bizin loue li!

⁵ Zot tou ansam, sant laglwar LESEGNER, parski li ti koz enn parol e li ti kree zot;

⁶ dapre so volonte zot ena zot plas permanan dan lespas e zot pakapav al andeor lalwa ki li finn fixe.

⁷ Loue LESEGNER depi lor later, zot bann mons dan lamer, tou seki dan profonder losean,

⁸ mem zekler ek lagrel, lanez ek brouyar, rafal siklonik ki ekzekit so lord, loue li!

⁹ Kolinn ek montagn, pie verze ek pie lafore,

¹⁰ zanimo domestik ek zanimo sovaz, reptil ek zwazo, zot bizin loue li!

¹¹ Bann lerwa lor later ek tou bann pep, prins ek dirizan, zot bizin loue li!

¹² E zot ousi, bann zennfi ek zennzan, grandimoun ansam ek zanfan.

¹³ Zot tou zot bizin sant grander LESEGNER! So nom tousel pli gran ki tou; so laglwar pli gran ki tou, li dominn later ek lesiel.

¹⁴ Li finn fer so pep vinn for; aster so bann fidel sant so laglwar; lepep Izrael, zotmem ki pre ar so leker. Alelouya, nou loue LESEGNER!