Psom 139 - Kreol Morisyen OT Portions

Segner Bondie Toupwisan

Pou sef koral. Enn Psom David.

¹ Segner, to finn examinn mwa net e to kone ki mo ete.

² To okouran kan mo asize, kan mo diboute; depi lwin laba to kone ki pase dan mo latet.

³ To kone sipa mo pe travay ou si mo pe kas poz; to ena tou konesans lor seki mo pe fer.

⁴ Avan mem mo ouver mo labous, SEGNER, to kone ki mo pou dir.

⁵ To la partou otour mwa e to pouvwar protez mwa.

⁶ To konn mwa dan enn fason parfe, sitan bien, ki li difisil pou konpran tousala.

⁷ Kot kapav al kasiet pou tom andeor to kontrol? Kot mo kapav sove pou mo pa tom dan to prezans?

⁸ Si mo mont dan lesiel to pou laba; si mo tom dan trou lamor, laba osi to pou prezan.

⁹ Si mo anvole, mo al lot kote, kot soley leve, si mo travers lamer pou al dan enn finfon, kot soley kouse,

¹⁰ to lame pou la pou gid mo pa, to lame drwat pou tini mwa ferm.

¹¹ Si mo dir, “Mo sir marenwar pou kasiet mwa, ki lalimier otour mwa pou vinn obskirite, “

¹² mo sir marenwar pa pou ase nwar pou kasiet mwa e lanwit pa pou ase som. Pou twa lalimier ek marenwar pa fer okenn diferans.

¹³ Se twa kreater sak parti mo lekor; se twa ki finn fasonn mwa dan vant mo mama.

¹⁴ Mo loue twa parski to finn kree mwa enn vre mervey, tou seki to fer li enn mervey, sa mo bizin rekonet.

¹⁵ To ti kone letan ti pe form mo bann lezo dan sekre, letan ti pe fasonn mwa dan profonder later.

¹⁶ To lizie ti trouv mo lekor ki pa ti ankor ena form. To ti fini tras tou mo bann zour avan mem ki mo lizie ti ouver pou trouv premie zour la.

¹⁷ O Bondie, konbien li difisil pou konn to panse; zot inpozan, telman ena boukou!

¹⁸ To ena plis plan dan to latet ki lagrin disab lor laplaz; mo pakapav konte; mo leve - mo touzour avek twa.

¹⁹ O Bondie, si selman to ti kapav fer move dimoun mor, e pous bann dimoun violan lwin ar mwa!

²⁰ Zot dir bann kalomni ek mesanste lor twa; zot zet labou lor to nom.

²¹ O SEGNER, mo deteste bann ki ayir twa, zot degoutan bann ki revolte kont twa.

²² Mo vremem ayir zot, mo konsider zot kouma mo ennmi personel.

²³ Examinn mwa, O Bondie pou to dekouver mo leker; teste mwa pou to konn mo panse.

²⁴ Gete tomem si ena lemal dan mwa e gid mwa lor sime leternite.