Psom 13 - Kreol Morisyen OT Portions

Segner Bondie protez mwa

Pou sef koral. Enn Psom David.

¹ SEGNER, komie letan ankor to pou bliye mwa? Pou touzour? Komie letan ankor to pou tourn ledo ar mwa?

² Komie letan ankor mo pou kourbe ar traka? Komie letan ankor lapenn pou nway mo leker lanwit-lizour? Komie letan ankor mo ennmi pou dominn lor mwa?

³ O SEGNER mo Bondie, reponn mo lapel! Refer mo lizie briye ar lasante; sinon zot pou ferme ar somey lamor;

⁴ sinon mo ennmi pou dir, “Mo pli for ki li, “ mo bann adverser pou dan lazwa si mo tonbe.

⁵ Mwa mo fer konfians to gran lamour fidel pou mwa; mo leker ranpli ar lazwa parski to finn sov mwa.

⁶ Mo pou kontinie sant pou LESEGNER parski li finn toultan bon anver mwa.