Psom 128 - Kreol Morisyen OT Portions

Vre rekonpans

Enn kantik pou pelerinaz.

¹ Bienere tou dimoun ki ena respe pou LESEGNER, bann ki swiv sime li finn trase.

² To travay pou ranpli to gardmanze; li donn twa boner ek prosperite.

³ To madam dan lakaz pou grandi to fami, li pou kouma enn pie rezin; e to bann zanfan pou parey bann brans zoliv otour to latab.

⁴ Samem benediksion ki pe atann enn dimoun ki obeyir LESEGNER.

⁵ LESEGNER beni twa depi Montagn Sion! Osi lontan to viv to pou temwin prosperite Zerizalem.

⁶ Mo priye ki to viv ase lontan pou get to tizanfan grandi. Ki Izrael beni ar lape!