Psom 124 - Kreol Morisyen OT Portions

Lesegner Bondie protez so pep

Enn kantik pou pelerinaz. Enn Psom David.

¹ Si LESEGNER pa ti mars ar nou - ale, repete O Izrael -

² Si LESEGNER pa ti mars ar nou ler nou ennmi ti pe atak nou

³ zot ti pou aval nou vivan dan zot koler ki ti pe sofe kont nou;

⁴ debordman ti pou sarye nou ale, toran ti pou kouver nou partou;

⁵ e nou ti pou nwaye par kouran toransiel.

⁶ Anou remersie LESEGNER ki finn anpes ennmi desir nou ar zot ledan.

⁷ Kouma ti zwazo nou finn reysi sap dan latrap saser; latrap la finn deklinke e aster nou lib.

⁸ Nou sekour sorti depi LESEGNER limem, kreater lesiel ek later.