Psom 12 - Kreol Morisyen OT Portions

Ed nou, Segner

Pou sef koral. Servi instriman wit lakord. Enn Psom David.

¹ Vinn sekour nou, SEGNER! To bann dimoun lwayal finn disparet; dimoun onet ek fidel, pa trouv zot mem.

² Dimoun partou nek koz manti; zot flate ar doub langaz pou tronp zot prosin.

³ Ki LESEGNER bous zot labous ki ranpli ar flatri! Atas zot lalang arogan ki dir,

⁴ “Ar parol dimiel nou lalang, nou gagn seki nou‘le. Nou labous dir seki nou anvi, e personn pa kapav aret nou. “

⁵ LESEGNER dir, “Parski bann pov pe soufer; bann oprime pe plor zot maler, Mwa mo pou leve, mo pou donn zot proteksion ki zot bizin. “

⁶ Nou fer konfians promes LESEGNER, so parol kler ek prop kouma larzan, enn metal presie ki finn pirifie set fwa dan dife laforz.

⁷ Twa, SEGNER, to gard to parol, protez nou touzour kont sa kalite move dimoun la.

⁸ Bann move dimoun pe rode partou, e partou koripsion pe gagn plis valer.