Psom 118 - Kreol Morisyen OT Portions

Lapriyer pou dir mersi Bondie

¹ Nou remersie LESEGNER parski li vremem bon, so lamour infini li eternel.

² Twa pep Izrael, dir for-for, “So lamour infini li eternel. “

³ Bann desandan Aaron dir, “So lamour infini li eternel. “

⁴ Nou tou ki ador li, anou dir, “So lamour infini li eternel. “

⁵ Kan mo ti dan detres, mo ti kriye LESEGNER e li ti tann mo lapriyer e li ti liber mwa.

⁶ LESEGNER li ar mwa mo pa per nannye; kisannla kapav tous mwa?

⁷ Grasa led ki LESEGNER donn mwa mo trouv defet mo bann ennmi.

⁸ Preferab met nou lavi dan lame LESEGNER, ki fer konfians enn imin.

⁹ Preferab met nou lavi dan lame LESEGNER, ki fer konfians bann dirizan imin.

¹⁰ Tou bann nasion ti fini antour mwa; grasa pwisans LESEGNER mo ti detrir zot.

¹¹ Zot ti fons lor mwa partou kote; grasa pwisans LESEGNER mo ti detrir zot.

¹² Zot ti desann lor mwa kouma enn niaz mous zonn me lor vites zot tengn kouma dife dan pikan; grasa pwisans LESEGNER mo ti detrir zot.

¹³ Enn latak feros ti bouskil mwa, pou sey zet mwa anba, me LESEGNER ti ed mwa.

¹⁴ LESEGNER ti fer mwa vinn for ek pwisan, limem mo Sover.

¹⁵ Ekout bann sante laviktwar ek delivrans sorti depi dan latant lepep Bondie: “Lafors LESEGNER finn trionfe!

¹⁶ Se so pwisans ki finn donn nou laviktwar - Lafors LESEGNER finn trionfe!”

¹⁷ Non, mo pa pou mor; okontrer mo pou viv mo lavi pou mo rakont bann mervey ki LESEGNER finn realize.

¹⁸ Li finn pini mwa severman pou mo erer me li pa finn detrir mwa.

¹⁹ Ouver laport Tanp ki rezerve pou bann fidel; mo pou al andan pou dir mersi LESEGNER.

²⁰ Samem laport LESEGNER; bann dimoun drwat kapav rant andan.

²¹ Mo dir twa mersi parski to finn reponn mwa, tomem mo Sover.

²² Ros ki mason ti rezete, zordi li ros prinsipal ki pe tini soubasman.

²³ Sa li plan LESEGNER; pli merveye ki sa peyna!

²⁴ Zordi se zour ki LESEGNER finn fer; nou tou ere; anou selebre lazwa sa gran zour la.

²⁵ Delivre nou, SEGNER, delivre nou! O SEGNER, nou sipliy twa, donn nou sikse!

²⁶ Ki Bondie beni seki rant isi dan nom LESEGNER. Depi dan so Tanp, nou partaz so benediksion ar zot.

²⁷ LESEGNER, limem Bondie; li finn donn nou so lalimier. Trap bann ramo dan zot lame, komans prosesion festival, e fer letour lotel.

²⁸ Tomem mo Bondie, mo sant to louanz. Tomem mo Bondie, mo pou proklam to grander.

²⁹ Nou remersie LESEGNER parski vremem li bon, so lamour infini li eternel.