Psom 115 - Kreol Morisyen OT Portions

Ena enn sel vre Bondie

¹ SEGNER, zis twa ki merit laglwar; zis twa, pa nou, parski twa ki lasours lamour infini e fidelite.

² Kifer bann nasion dimande, “Kot zot Bondie, zot? “

³ Nou Bondie, limem viv dan lesiel e li fer tou seki li anvi fer.

⁴ Bannla zot bondie fabrike ar metal kouma lor ek larzan par lame imin.

⁵ Zot ena labous me zot pa kapav koze; zot ena lizie me zot pa trouv kler.

⁶ Zot ena zorey me zot pa tande; zot ena nene me zot pa santi loder.

⁷ Zot ena lame me zot pa santi nannye; zot ena lipie me zot pa kapav marse; okenn son pa sorti dan zot lagorz.

⁸ Bann artizan ki fabrik idol e met zot konfians dan metal, pou vinn parey kouma zot idol ki zot finn fabrike.

⁹ Twa pep Izrael, met to konfians dan LESEGNER. Limem to protekter ek to sekour.

¹⁰ Zot, bann pret dan tanp Lesegner, met zot konfians dan lame LESEGNER. Limem zot protekter ek zot sekour.

¹¹ Zot tou ki respekte LESEGNER, met zot konfians dan LESEGNER. Limem zot protekter ek zot sekour.

¹² LESEGNER rapel ki nou ete e li beni nou; li pou beni lepep Izrael, li pou beni bann desandan Aaron.

¹³ Li pou beni tou dimoun ki respekte li, ti-dimoun kouma grandimoun.

¹⁴ SEGNER donn zot boukou zanfan; parey pou zot desandan!

¹⁵ Ki LESEGNER beni zot, LESEGNER ki finn kree later ek lesiel.

¹⁶ Lesiel, sa li lesiel LESEGNER me li finn donn limanite later pou li viv.

¹⁷ Dimoun mor pa loue LESEGNER; ni bann ki desann dan lemond gran silans.

¹⁸ Me nou, nou remersie LESEGNER aster, pli divan ek toultan. Alelouya, nou sant louanz LESEGNER!