Psom 109 - Kreol Morisyen OT Portions

Konplint enn dimoun dan traka

Pou sef koral. Enn Psom David.

¹ Bondie, twa ki mo loue, pa gard silans.

² Move dimoun, ipokrit ek manter, pe atak mwa ar zot lalang mansonz.

³ Zot invant zistwar lor mwa e fer mwa ditor san okenn rezon.

⁴ Zot akiz mwa malgre mo kontan zot e mo finn priye pou zot.

⁵ Pou dibien ki mo fer, zot rann mwa par lemal; pou lamour ki mo done, zot rann mwa laenn.

⁶ Swazir enn akizater kont li, swazir enn move dimoun pou debout lor so kote drwat.

⁷ Fer ziz la deklar li koupab lafin so prose; fer ki mem so lapriyer enn ofans kont Bondie.

⁸ Fer lamor zwenn li vit; fer enn lot dimoun gagn so travay!

⁹ Fer so fam vinn vev ek so zanfan orfelin!

¹⁰ Fer so zanfan vinn mandian e viv dan lari; ki zot al mandie lwin ar zot lakaz anrwinn!

¹¹ Fer bann kaser sezi so dibien; fer bann etranze profit so travay!

¹² Pa les personn montre li zantiyes; pa les personn okip so zanfan kan li mor!

¹³ Pran lavi tou so desandan! Koumsa so nom pou disparet pou toultan.

¹⁴ Rapel LESEGNER pese so bann anset; zame bliye pese so mama!

¹⁵ SEGNER, rapel bien tou zot pese me bliye vit zot lekzistans!

¹⁶ Sa move dimoun la zame li ti fer dibien pou lezot; li ti zis konn fer mizer bann pov e seki peyna nannye, kraz enn malere ziska fini li net.

¹⁷ Li ti kontan modi lezot. Aster fer li sarye malediksion. Zame li ti demann Bondie beni lezot. Aster les li viv san benediksion!

¹⁸ Li ti modi lezot koumadir malediksion enn zafer normal; aster fer so prop malediksion tranp so lapo e kouma delwil, rant partou ziska so dan so lezo!

¹⁹ Fer so prop malediksion kouver so lekor kouma linz e ser so lerin toulezour kouma sang.

²⁰ SEGNER, koumsa ki to bizin pini mo ennmi; koumsa to bizin pini bann ki fer mwa ditor.

²¹ SEGNER, mo Segner, ed mwa pou loner to nom; parski to lamour infini telman bon, sov mwa.

²² Mo pov; mo enn malere; mo blese dan profonder mo leker.

²³ Mo lavi pase, kouma lonbraz letan aswar aprose; kouma sotrel ki divan siklonn soufle kot li anvi.

²⁴ Telman mo pa finn manze, mo zenou pe tranble; mo finn vinn lapo-lezo.

²⁵ Kan dimoun trouv mwa zot sikane; zot sekwe latet pou montre zot mepriz mwa.

²⁶ Ed mwa, SEGNER, mo Bondie! Parski to lamour li infini, sov mwa!

²⁷ Fer mo ennmi kone ki twa ki finn azir ki twa, SEGNER, to mars ar mwa.

²⁸ Mem si bannla modi mwa, twa to beni mwa. Fer bann ki martiriz mwa konn defet e fer mwa, to serviter, gagn enn gran boner.

²⁹ Anvlop mo ennmi dan disgras; fer zot met kostim laont.

³⁰ Mo pou dir LESEGNER mersi for-for; mo pou koz so grander dan lasanble lepep

³¹ parski li defann bann pov e sov zot kont dominer ki rod kondann zot amor.