Psom 108 - Kreol Morisyen OT Portions

Enn lapriyer pou gagn led kont nou ennmi

Enn sante. Enn Psom David.

¹ Mo leker ferm ar konfians, O Bondie! Mo pou sante, mo pou fer melodi ar tou mo leker!

² Leve, twa mo lagitar ek mo sitar! Mo pou fer soley leve.

³ Mo pou dir twa mersi, O SEGNER, divan tou bann pep. Mo pou sant to louanz parmi bann nasion.

⁴ To lamour infini depas oter lesiel; to fidelite travers tou bann domenn seles.

⁵ O Bondie, montre to grander dan lesiel; montre to laglwar partou lor later.

⁶ Sov nou ar to lafors; ekout mo lapriyer pou ki lepep ki to kontan gagn so liberasion.

⁷ Depi dan so sanktyer Bondie finn dir, “Pou montre mo pouvwar, mo pou diviz Sikem e mo pou donn mo pep Vale Soukot.

⁸ Mo pou gard pou mwa Galaad ek Manase; Efraim vinn mo kask e Zide vinn mo sinbol rwayote.

⁹ Mo pou servi Moab kouma mo kivet e mo pou lans mo savat lor Edom pou montre ki mwa ki so propriyeter. Mo pou kriye for-for mo laviktwar lor bann Filistin. “

¹⁰ Kisannla pou amenn mwa dan lavil fortifie? Kisannla pou amenn mwa Edom?

¹¹ Eski vremem to finn rezet nou, O Bondie? Vremem to pa pou mars ar nou larme?

¹² Ed nou, O Bondie, kont nou ennmi; koudme dimoun peyna gran valer.

¹³ Avek Bondie nou pou ranport laviktwar. Li pou kraz nou lennmi.