Psom 103 - Kreol Morisyen OT Portions

Lamour infini Lesegner Bondie

Enn Psom David.

¹ Ar tou seki mo ete mo remersie LESEGNER! Ar tou mo leker mo remersie so sin nom!

² Ar tou seki mo ete mo remersie LESEGNER! Pa bliye okenn gran bonte ki li finn montre!

³ Li pardonn tou to pese; geri to maladi.

⁴ Li ras to lavi dan tom, anpes lamor koste, e li kouronn twa ar lamour ek tandres.

⁵ Li ranpli to lavi ar tou seki bon pou to res for ek zenn kouma enn leg.

⁶ LESEGNER zize dan lintere bann ki soufer dominasion e li donn zot zot drwa.

⁷ Li ti revel so bann plan ar Moiz e lepep Izrael ti trouv so gran explwa.

⁸ Leker LESEGNER li ranpli ar konpasion ek pitie; difisil pou li fer koler parski so lamour infini deborde partou.

⁹ Li pa fer akizasion lor akizasion, e so lakoler osi tengn bien vit.

¹⁰ Li pa tret nou dapre nou pese, li pa pini nou dapre nou bann fot.

¹¹ So lamour infini pou dimoun ki onor li li osi ot ek gran ki lesiel ete konpare ar later.

¹² Li separ nou ar nou pese parey distans ki ant soley leve ek soley kouse.

¹³ Parey kouma enn papa ena konpasion anver so zanfan LESEGNER ena konpasion anver bann ki onor li.

¹⁴ Li bien kone kouma ti form nou; li kone ki nou sorti dan lapousier.

¹⁵ Bann imin zot lavi kouma lerb. Zot grandi ek fleri kouma fler sovaz;

¹⁶ ler labriz soufle, tou petal grene, personn pa rapel kot so plas ti ete.

¹⁷ Depi touzour ziska touzour LESEGNER ena enn lamour infini pou bann ki onor li; e so fidelite pou dire pou zanfan zot zanfan;

¹⁸ so bonte beni dimoun ki respe so lalians e ki obeyir so bann komandman.

¹⁹ LESEGNER finn plas so tronn dan lesiel; li enn monark siprem ki regne lor tou.

²⁰ Zot tou bann anz ki for ek kouraze, ki akonplir so instriksion e ki obeyir parol ki li dir, remersie LESEGNER.

²¹ Tou so bann larme dan lesiel, bann serviter ki ekzekit so volonte, remersie LESEGNER.

²² Tou bann kreatir partou dan liniver ki li dirize remersie LESEGNER. Ar tou seki mo ete mo remersie LESEGNER.