Psom 102 - Kreol Morisyen OT Portions

Lapriyer enn zenes dan lapenn

Lapriyer enn malere ki nepli ena lafors. Li expoz so konplint devan LESEGNER.

¹ SEGNER, ekout mo lapriyer; ekout mwa kriye mo detres.

² Kan mo bizin led, pa tourn to ledo kan mo dan detres; ekout mo lapriyer, pa tarde pou reponn mwa.

³ Kouma lafime mo lavi pe disparet e mo lekor pe konsome dan dife.

⁴ Mo kouma lerb sek ki kraze dan later e manze mo nepli anvi manze.

⁵ Mo plegne for-for; mo finn vinn lapo-lezo.

⁶ Mo kouma enn zwazo sovaz dan dezer; enn ibou dan rwinn abandone.

⁷ Dormi mo pa dormi; mo kouma enn zwazo soliter tousel lor enn twa lakaz.

⁸ Toulezour mo ennmi provok mwa; pe servi mo nom pou zet malediksion.

⁹ Akoz to mekontan ek ankoler ar mwa lasann finn ranplas mo dipin,

¹⁰ e larm plin mo goble. To finn balye mwa dan kwin.

¹¹ Mo lavi pase kouma lonbraz aswar, mo kouma lerb sek.

¹² Me twa SEGNER, tomem monark siprem eternel; sa, enn lasenn zenerasion zame pou bliye.

¹³ To pou drese e montre pitie pou Sion; ler finn vini pou montre li to faver; wi, vremem so ler finn vini aster.

¹⁴ Bann ki kontan twa zot osi kontan li mem si li finn konn destriksion; zot ena boukou sagrin pou li mem si zordi Sion li anrwinn.

¹⁵ Bann nasion zot respe LESEGNER; bann lerwa lor later ena reverans pou li.

¹⁶ LESEGNER pou rekonstrir Sion e li pou montre so laglwar.

¹⁷ Li pou tann soufrans so pep abandone e li pou ekzos zot lapriyer.

¹⁸ Dan lintere zenerasion fitir, anou ekrir sa, koumsa bann ki pa ankor ne kapav enn zour sant so louanz:

¹⁹ depi lao dan so sanktyer LESEGNER ti get anba; depi lesiel lao li ti get later,

²⁰ pou li tann bann prizonie pe kriye zot soufrans, pou li liber bann ki ti dan koulwar lamor.

²¹ Akoz sa nou pou onor so nom dan Sion; nou pou loue li dan Zerizalem

²² kan dimoun partou kote zwenn e bann rwayom osi, pou ador LESEGNER.

²³ LESEGNER finn afebli mwa, mem mo ankor zenn; li finn tay longer mo lavi.

²⁴ Lerla mo dir, “Bondie, pa pran mo lavi asterla, mo ankor zenn; Twa, ki viv depi touzour e pou touzour! “

²⁵ Lontan-lontan to ti kree fondasion later e ar to prop lame to ti fer lesiel.

²⁶ Kan to kreasion disparet twa to pou touzour la; kouma vie sifon zot pou defile ek desire. To sanz zot kouma linz, zot zistwar pou fini lamem.

²⁷ Me twa to pa sanze, to lavi pa konn finision.

²⁸ Nou to serviter, e nou zanfan pou viv ansekirite, zanfan nou zanfan pou viv anpe dan to proteksion.