Psom 10 - Kreol Morisyen OT Portions

Segner Bondie, ed mwa kont bann opreser

¹ Kifer to res lwin ar nou, SEGNER? Kifer pa trouv twa dan moman detres?

² Avek arogans move dimoun persekit bann pov; zot may bannla dan zot latrap.

³ Move dimoun li fier so prop move dezir; dimoun gourman li modi LESEGNER e li peyna respe pou li.

⁴ Dan so arogans move dimoun pa pran Bondie kont; dan so panse peyna plas pou Bondie.

⁵ Move dimoun reysi tou saki li fer. Li pa konpran lazistis divinn, sa tro lwin pou li e li mepriz so ennmi.

⁶ Li dir ar limem, “Peyna nannye ki kapav bouz mwa! Problem ek traka? Zame zot pa pou tous mwa! “

⁷ So labous ranpli ar malediksion; li modi, li koz manti, li menase; anba so lalang ena parol blesan ek mesanste.

⁸ Li kasiet pre ar bann vilaz san defans e atann so ler pou touy inosan; dan kasiet li espionn so viktim;

⁹ li res dan kasiet parey enn lion, li vey so ler pou atake; li ris bann pov, li trenn zot dan so piez.

¹⁰ Bann viktim san defans pa sape e zot tom dan so pouvwar.

¹¹ Dan so panse move dimoun dir, “Bondie pa pran kont; so figir tourn lot kote, zame li pou trouve. “

¹² Lev twa, SEGNER! Lev to lame pou pini zot, Bondie; pa bliye bann ki pe soufer!

¹³ Kifer move dimoun mepriz Bondie? Li dir, “Bondie pa pou demann mwa rann kont. “

¹⁴ Tousa pa vre! To bien trouv tou. To kone ena problem ek soufrans e to pran tou dan to lame. Bann ki feb ek san defans zot remet zotmem dan to lame. To finn toultan vinn osekour orfelin.

¹⁵ Kas lerin move dimoun ki viv dan pese; grenn zot mesanste ziska pa res nannye.

¹⁶ LESEGNER, limem Lerwa pou leternite. Bann ki priye lezot bondie pa pou ena plas dan pei LESEGNER.

¹⁷ SEGNER, to tann dezir bann ti dimoun, to pou ekout bann feb e donn zot kouraz.

¹⁸ To pou rann zistis an faver bann ki pe gagn kraze kouma orfelin; koumsa bann zans ordiner pou aret sem laterer.