Proverb 28 - Kreol Morisyen OT Portions

¹ Bann move dimoun sove mem kan pena danze; me bann bon dimoun res brav kouma enn lion.

² Kan enn pei revolte, boukou sef rod pran pouvwar; me kan enn dirizan intelizan ek saz, so pouvwar res solid.

³ Kan enn diktater leve ek fer dominer ar bann pov, li kouma gro lapli ki detrir tou rekolt.

⁴ Bann ki rezet lalwa, donn rezon bann malfeter; bann ki respekte lalwa, konbat bann malfeter.

⁵ Move dimoun pa konpran nanye lor lazistis; me bann ki respekte LESEGNER konpran tou.

⁶ Preferab pov, me onet ki ris, me malonet.

⁷ Bann zenes ki ena disernman, zot obzerv lalwa; me seki ena move frekantasion fer so paran onte.

⁸ Bann kaser ki vinn ris lor ledo lezot, pa pou kapav profit zot larzan; enn zour, dimoun ki ed bann pov ki pou erit zot rises.

⁹ Si kikenn pa ouver so zorey pou ekout lalwa, Bondie osi pa pou ekout so lapriyer.

¹⁰ Tou seki antrenn bon dimoun dan sime lemal, pou tom dan zot prop piez. Me bann dimoun onet pou konn enn lavenir ere.

¹¹ Dimoun ris fer sanblan zot saz; me enn pov ki ena disernman, kapav demaske zot.

¹² Kan bon dimoun gagn laviktwar, lepep selebre; kan move dimoun pran pouvwar, lepep prefer kasiet.

¹³ Seki kasiet so pese zame pou progrese; me seki rekonet so fot e desid pou sanze, so pese pou pardone.

¹⁴ Bienere dimoun ki gagn per pou fer lemal; me bann leker dir ki pa oule sanze, pou rwine.

¹⁵ Enn move dirizan ki fer dominer ar lepep malere, li kouma enn zanimo feros anraze.

¹⁶ Enn lider bet fer dominer pou li vinn ris lor ledo bann pov; me dirizan ki deteste larzan mal-gagne, pou viv lontan.

¹⁷ Enn dimoun ki ena disan lor so lame, li bizin pey pou so krim ziska li mor.

¹⁸ Dimoun onet pena pou per nanye; me bann malonet pou tom dan trou.

¹⁹ Seki travay so later, pa pou mank manze; me seki perdi letan kas poz, pou touzour malere.

²⁰ Dimoun onet pou gagn boukou benediksion; me bann ki rod vinn ris tro vit, pou gagn zot pinision.

²¹ Get ar de lizie, li enn move zafer; malerezman, ena ki pran gous pou donn faver.

²² Enn dimoun peng galoup deryer larzan; me li pa kone ki maler deryer laport.

²³ Avek letan, nou pou pli apresie enn remark sinser; ki enn dimoun ki pas diber.

²⁴ Zanfan ki kokin so paran e ki dir: “pa enn pese sa,” li pa pli bon ki enn bandi.

²⁵ Enn dimoun ki nek rod plin so pos, kre zizani; me seki met so konfians danLESEGNER pou gagn benediksion.

²⁶ Dimoun bet krwar li enn terib; me dimoun saz konn sorti dan danze.

²⁷ Seki ed bann pov zame mank nanye; me seki ferm lizie divan lamizer lezot, pou gagn malediksion.

²⁸ Kan diktater pran pouvwar, dimoun al kasiet; me kan li mor, boukou bon lider leve.