Proverb 21 - Kreol Morisyen OT Portions

¹ Lespri enn dirizan kouma enn larivier dan lame LESEGNER; li diriz li kot li anvi.

² To kapav panse ki to ena rezon; me LESEGNER konn bien to lintansion.

³ LESEGNER prefer ladrwatir ek lazistis ki enn lofrand.

⁴ Move dimoun ena regar meprizan ek leker arogan; samem ki met zot pese okler.

⁵ Prepar to proze avek swin e to pou gagn sikse; me si to rod al tro vit, to pou zwenn tase.

⁶ Larises ki to gagne kan to koz manti, li atir twa dan lamor e li disparet vit.

⁷ Move dimoun kondane par zot prop violans. Kifer zot refiz sanze?

⁸ Bann malonet mars lor sime traver; dimoun zis swazir sime bien drwat.

⁹ Prefer dormi deor, dan kwin lakaz; ki dan lakaz, ar enn dimoun gran labous.

¹⁰ Move dimoun pans zis fer lemal; zot pena pitie pou personn.

¹¹ Kan vantar gagn pinision, mem ignoran gagn enn leson; me linstriksion grandi konesans enn saz.

¹² Bondie li zis! Li konn tou seki pase dan lakaz move dimoun; li pou donn zot pinision ki zot merite.

¹³ Si to refiz ekoute kan bann pov kriye, tou zorey pou sourd, ler twa to rod sekour.

¹⁴ Si to anvi kalme koler kikenn, donn li enn kado an-sekre; si to anvi tengn so laraz, glis enn ti prezan dan so pos.

¹⁵ Kan lazistis triyonfe, bon dimoun kontan; me bann malfeter gagn per.

¹⁶ Dimoun ki pa swiv bon sime konesans, bien vit pou rant dan bis lamor.

¹⁷ Dimoun ki kontan lamizman pou res pov; dimoun ki kontan labwason zame pou vinn ris.

¹⁸ Kan bann move dimoun rod piez bann bon dimoun, zot invit katastrof lor zotmem.

¹⁹ Preferab viv dan dezer, ki viv ar enn partner move karakter.

²⁰ Dan lakaz enn saz ena bann gran rises; bann dimoun bet gaspiy pou zot sanses.

²¹ Rod touzour labonte ek lazistis e to pou viv lontan; dimoun pou respekte twa e pou onor twa.

²² Enn zeneral saz, pou reisi pran enn lavil bien proteze; li pou arive kraz miray sitadel.

²³ Vey bien to langaz, e problem pa pou vinn dan to lakaz.

²⁴ Dimoun ki fier ek vantar, zot insolan; zot azir ek boukou larogans.

²⁵ Dimoun pares mor avan zot realiz so dezir; an-efe, so lame lour pou travay later.

²⁶ Bann pares pas letan anvi kitsoz lezot; me bon dimoun donn zot kitsoz ek leker kontan.

²⁷ Lofrand enn malfeter bien degoutan; sirtou kan li ofer li avek enn move lintansion.

²⁸ Bann fos temwin pou disparet; me dimoun ki konn ekoute, li pou kapav temwagne avek sikse.

²⁹ Move dimoun fer sanblan zot serye; bon dimoun viv enn lavi exanpler.

³⁰ Mem si to ena bann verti kouma lasazes, bon rezonnman, ek disernman, to pa pou kapav defie LESEGNER.

³¹ Nou kapav prepar bann seval pou konba; me zisLESEGNER ki donn laviktwar.