Proverb 19 - Kreol Morisyen OT Portions

¹ Preferab pov, me onet; ki manter e bet.

² Kan pa pran letan reflesi avan azir, li danzere; kan tro prese, kapav zwenn kogne.

³ Ena ki detrir zot lavi ar zot prop erer; apre sa, zot ankoler kont LESEGNER.

⁴ Dimoun ris, touletan gagn boukou nouvo kamarad; dimoun pov perdi so sel kamarad.

⁵ Enn zour, fos temwin pou konn kondanasion; manter pou gagn so pinision.

⁶ Setaki oule gagn faver enn dimoun bon leker; tou dimoun kamarad ar kikenn ki zenere.

⁷ Si dimoun mizer gagn rezete par so prop frer, zize aster kouma so bann kamarad pou fer ar li! Li fer tou pou koz ar zot, me so parol tom dan dilo.

⁸ Aprann gagn lasazes e to pou viv ere; viv ek disernman e to pou prospere.

⁹ Enn zour, fos temwin pou gagn seki li merite; bann manter napa pou sape.

¹⁰ Li drol kan enn dimoun bet viv dan lix; me li pli drol kan enn serviter diriz so sef.

¹¹ Dimoun rezonab kontrol so koler; kan li pardonn lezot, li gagn plis loner.

¹² Kan lerwa ankoler tou dimoun gagn per; me so bonte kouma laroze ki rafresi lerb ver.

¹³ Zanfan malelve met papa dan traka; enn fam ki pa aret dispite, li kouma enn tiyo ki perse.

¹⁴ Enn dimoun kapav erit lakaz ek larzan ar so paran; me enn fam intelizan, li enn benediksion LESEGNER.

¹⁵ Si to pares, si to kontan dormi, pa rod manze kan vant grogne.

¹⁶ Obzerv komannman Bondie e to pou viv bien; me si to rezet so parol to pou trouv lamor.

¹⁷ Kan to ed bann pov, to pe pret LESEGNER, limem ki pou rekonpans twa.

¹⁸ Koriz to zanfan kan ankor ena letan; me dan to koler, zame pa swet so maler.

¹⁹ Enn dimoun violan bizin pey konsekans; sinon, sak fwa li pou refer so violans.

²⁰ Si to ekout bann konsey, si to dispoze pou aprann to leson, dousma-dousma to pou vinn saz.

²¹ Dimoun kapav fer boukou proze; me volonte LESEGNER ki pou realize.

²² Nou apresie dimoun bon ek sinser; mil fwa to pov ki to manter.

²³ Respekte LESEGNER e to pou viv bien; to pou viv an-sekirite e maler pa pou koste ar twa.

²⁴ Dimoun pares met lame dan lasiet manze, me li tro feb pou met manze-la dan so labous.

²⁵ Koriz enn insolan, bann bet pou aprann vinn pridan; montre enn bon dimoun so erer, li pou vinn pli intelizan.

²⁶ Zanfan ki bat so papa e rezet so mama, li atir laont ek dezoner.

²⁷ Mo zanfan, pa aret aprann; sinon, to pou bliye seki to deza kone.

²⁸ Pena lazistis kan fos temwin koz manti pou koulout bon dimoun. Move dimoun nek medit lemal.

²⁹ Bann insolan pou gagn kondanasion; bann bet pou gagn pinision.