Proverb 15 - Kreol Morisyen OT Portions

¹ Enn repons dou tengn lakoler; enn koze brit anflam laraz.

² Parol enn saz fer gagn konesans; kan bann bet ouver labous, zis betiz ki sorti.

³ Lizie LESEGNER trouv partou; li obzerv seki bon ek seki move.

⁴ Bann zoli parol amenn lavi; koze gra fer leker fermal.

⁵ Enn inbesil pa pran kont konsey so paran; zanfan saz aksepte kan so paran met li dan bon sime.

⁶ Kan nou viv dan drwatir nou rises ogmante; kan nou viv dan pese, maler pou rwinn nou dibien.

⁷ Labous bann dimoun saz repann konesans; me bann dimoun bet ena lespri kokom.

⁸ Lapriyer bon dimoun fer LESEGNER plezir; me li deteste lofrand bann malonet.

⁹ LESEGNER deteste konportman bann move dimoun; me li kontan bann ki azir bien.

¹⁰ Si to swiv enn move sime, to pinision pou sever; si to deteste repros, to pou zwenn lamor.

¹¹ LESEGNER okouran tou seki pase dan lemond bann mor; eski li pa pou kone ki pase dan nou leker?

¹² Bann insolan pa kontan kan kritik zot; zame zot pa pou dimann konsey enn saz.

¹³ Kan ena lazwa dan leker, pou ena sourir lor lalev; me kan leker fermal, lespri abat.

¹⁴ Dimoun saz gagn swaf konesans; dimoun bet manz zis so foli.

¹⁵ Lavi enn pov li pa fasil me kan ena lazwa dan leker, lavi kouma enn fet.

¹⁶ Preferab gagn tigit, me ena respe pou LESEGNER; ki gagn boukou avek enn ta traka.

¹⁷ Prefer manz enn ti repa sinp kot lamour regne; ki enn gran festin ar bann ipokrit.

¹⁸ Kan dimoun sof vit, dispit pran pouvwar; kan dimoun res kalm, lape gagn viktwar.

¹⁹ Sime bann pares ranpli ar pikan; me lor sime bann ki onet pena obstak.

²⁰ Zanfan saz fer zot paran kontan; move zanfan fer zot paran plore.

²¹ Dimoun bet gagn plezir dan lafoli; dimoun rezonab mars dan enn sime drwat.

²² San bon konsey, to proze kapote; boukou bon konseye fer to proze avanse.

²³ Ala nou kontan kan nou reysi donn enn bon repons; sa fer plezir kan nou koz enn bon parol zis kan bizin.

²⁴ Dimoun saz pran sime ki donn lavi, pa sime ki donn lamor.

²⁵ LESEGNER detrir lakaz bann orgeye, me li protez propriete bann vev.

²⁶ LESEGNER deteste bann move lintansion; me li kontan bann parol amikal.

²⁷ Si to galoup deryer larzan mal-gagne, to amenn problem lor to fami; si to pa pran gous, to pou viv lontan.

²⁸ Bon dimoun reflesi avan reponn; me labous move dimoun koz zis parol lemal.

²⁹ LESEGNER res lwin ar bann move dimoun; me li ekzos lapriyer bann bon dimoun.

³⁰ Enn regar amikal fer leker kontan; enn bon nouvel fer nou repran kouraz.

³¹ Dimoun ki ekout bon konsey dan lavi, li ena so plas parmi bann saz.

³² Si to ignor bon konsey, to fer tomem ditor; me si to aksepte zot to vinn pli saz.

³³ Respe pou LESEGNER fer gagn lasazes; limilite ouver laport loner.