Proverb 10 - Kreol Morisyen OT Portions

Bann proverb Salomon lor lavi moral

¹ Bann zanfan saz fer leker zot paran kontan; zanfan bet fer leker zot paran fermal.

² Rises mal-gagne fer lavi amer; me enn lavi onet tir twa dan piez lamor.

³ LESEGNER pa pou les bon dimoun mordefin; me li pou anpes bann malfeter akonpli zot move dezir.

⁴ Lame enn dimoun pares amenn lamizer; me lame enn bon travayer amenn larises.

⁵ Li enn loner pou dimoun ki rekolte dan bon sezon; me li enn laont pou dimoun ki dormi dan sezon rekolt.

⁶ Benediksion pou lor latet bann bon dimoun; me laviolans sort dan labous bann leker sal.

⁷ Souvenir enn bon dimoun rann nou ere. Me kan enn malfeter mor, bien vit nou bliye so nom.

⁸ Dimoun saz ek rezonab ekout bon konsey; me enn bet ki koz ninport fini dan presipis.

⁹ Dimoun onet viv an-sekirite; me bann malonet zwenn tase.

¹⁰ Dimoun ki pez lizie pou anbet lezot, amenn problem; bann ki pa per pou korize, amenn lape.

¹¹ Parol bon dimoun kouma enn lasours ki donn lavi; me parol enn malfeter kasiet boukou violans.

¹² Laenn alim dife; lamour pardonn erer.

¹³ Bann dimoun intelizan pronons bann bon parol; me bann ki koz ninport merit enn pinision.

¹⁴ Dimoun ki saz gard konesans kouma enn trezor; me kan ti-lespri koze, larwinn zame lwin.

¹⁵ Dibien enn ris protez li kouma enn fortres; lamizer enn pov ronz li kouma karya.

¹⁶ Lapey enn dimoun onet amenn nouvo lavi; lapey enn dimoun malonet servi pou fer pese.

¹⁷ Seki ekoute kan koriz li, li progrese lor sime lavi; seki zame aksepte so erer, li perdi so sime.

¹⁸ Seki kasiet laenn dan so leker, li enn manter; e seki fann fos rimer, li enn palabrer.

¹⁹ Plis to koz boukou, plis to ena risk fer pese; enn saz konn kontrol so lalang.

²⁰ Parol enn bon dimoun, li kouma metal presie; lespri dimoun malsin, li kouma enn drom vid.

²¹ Parol bann zis, nouri boukou dimoun; me bann bet mor par zot prop betiz.

²² Benediksion LESEGNER amenn larises; me pa latristes.

²³ Dimoun ti-lespri gagn plezir dan pratik lemal; dimoun ki ena rezonnman gagn plezir dan pratik lasazes.

²⁴ Dimoun drwat gagn seki zot dezire; move dimoun gagn seki zot plis per.

²⁵ Tanpet vini, move dimoun anvole; me bon dimoun touletan reziste.

²⁶ Dimoun pares minn zot anplwayer, parey kouma lafime bril lizie, e vineg fer ledan grinse.

²⁷ Dimoun ki respekte LESEGNER pou viv pli lontan; me bann malfeter pou mor avan ler.

²⁸ Lespwar bon dimoun donn zot lazwa; move dimoun pena lavenir ditou.

²⁹ LESEGNER protez bann bon dimoun ar pwisans; me li detrir bann dimoun ki fer lemal.

³⁰ Dimoun drwat pou viv an-sekirite; dimoun traver pou zwenn tase.

³¹ Bann dimoun drwat koz langaz lasazes; me bann ki ena lalang manter pou gagn pinision.

³² Parol bann bon dimoun fer plezir; mansonz bann move dimoun fer soufer.