Proverb 1 - Kreol Morisyen OT Portions

¹ Bann proverb Salomon, garson David, lerwa Izrael.

Ala kifer finn ekrir sa liv-la

² Finn ekrir sa bann proverb-la pou ansegn lasazes ek pou donn enn bon ledikasion, pou donn bann bon parol ki ekler lespri,

³ pou montre kouma pou viv enn lavi drwat, pou pratik lazistis ek viv onet;

⁴ pou ed bann ignoran pran prekosion, pou donn bann zenes konesans ek kapasite pou reflesi.

⁵ Si kikenn deza saz, les li ekoute kanmem, pou so konesans ogmante; mem si kikenn deza ena disernman, sa pou ed li viv enn lavi drwat;

⁶ li ava aprann bann proverb ek zot sinifikasion; li ava konpran parol bann saz ek zot sans.

⁷ Rekonet lotorite LESEGNER, samem komansman konesans; zis bann vantar ki ignor lasazes ek bon ledikasion.

Pa frekant move dimoun

⁸ Mo zanfan, ekout konsey to papa, pa rezet lansegnman to mama.

⁹ Zot pou kouma enn kouronn lor to latet; kouma enn zoli kolie otour to likou.

¹⁰ Mo zanfan, si move dimoun rod tant twa, pa rant dan zot piez.

¹¹ Si zot dir twa: “Vinn ar nou pou atak antret ek pou vers disan; vinn kasiet ar nou pou nou tom lor bann inosan e touy zot par plezir.

¹² Anou aval zot antie; fer zot rant dan zot tom enn fwa.

¹³ Nou pou vinn ris ar zot bann dibien; nou pou ranpli nou lakaz ar lobze kokin.

¹⁴ Partner, rant dan nou korom, kan nou kas-fann, twa osi to pou gagn to par.”

¹⁵ Mo zanfan, pa mars lor zot sime, evit pran zot larout.

¹⁶ Zot pe prese pou al fer krim, zot pe degaze pou vers disan.

¹⁷ Initil to met latrap pou may zwazo, kan zwazo la pe trouv twa.

¹⁸ Bann move dimoun atak antret; marke-garde, zot prop disan ki pou verse. Zot kasiet pou touy bann inosan, me zot prop lavi ki pou menase.

¹⁹ Ala ki manier bann ki vinn ris par violans pou fini: rises ki zot gagne dan krim pou pran zot prop lavi.

Lasazes pe met angard

²⁰ Lasazes pe kriye for-for dan lari; So lavwa domine dan bann plas piblik.

²¹ Li pe kriye dan tapaz lavil; Dan lantre lavil, li pe dir:

²² “Bann bet, Komie letan ankor zot pou kontan zot betiz? Komie letan ankor bann insolan pou kontign insilte? Komie letan ankor bann inbesil pou ignor konesans?

²³ Pran kont mo bann repros, mo ava donn twa mo konesans; mo ava grav mo parol dan to leker.

²⁴ Kan mo finn apel zot, zot pa finn ekoute; Kan mo finn ouver mo lebra, zot finn vir zot ledo;

²⁵ zot pa finn aksepte mo bann konsey; e zot finn rezet mo bann repros.

²⁶ Fer atansion! Mwa ki pou riy zot kan zot pou dan maler; Mo pou boufonn zot kan zot pou dan lafreyer.

²⁷ Kan panik tom lor zot kouma siklonn, Kan katastrof sezi zot kouma tanpet, Kan traka ek detres anglouti zot,

²⁸ lerla, zot pou rod mo led, me mo pa pou reponn; zot pou rod mo sekour, me zot pa pou trouv mwa.

²⁹ Parski zot ti ignor konesans, e zot ti refiz respekte LESEGNER.

³⁰ Zot finn rezet mo konsey; e zot finn ignor mo bann repros.

³¹ Asterla, zot pou pey konsekans zot betiz, zot pou degout zot lavi ar zot bann move aksion.

³² Bann ti-lespri pou mor dan zot mesanste, bann fezer pou detrir ar zot prop lorgey.

³³ Me seki ekout mo parol, li pou an-sekirite, li pou viv lwin ar maler e dan trankilite.”