Izai 9 - Kreol Morisyen OT Portions

Regn lazistis lerwa ki pe vini

¹ Lepep ki ti pe mars dan teneb finn trouv enn gran lalimier. Enn lalimier pe briye pou bann ki ti pe viv lor later marenwar.

² To finn fer nasion-la grandi, to finn miltipliye so lazwa. Zot dan lazwa divan twa parey kouma nou zwaye kan rekolt vini, parey kouma nou kontan kan fer partaz enn trezor.

³ Parski pwa ki ti pe pez lor li, fardo lor so zepol, baton so sardar, to finn kas zot kouma kan bann Madianit ti gagn bate.

⁴ Tou bot bann lennmi ki rezone lor later, tou iniform bann solda ki tase ar disan, pou bril zot, dife pou manz zot.

⁵ Enn zanfan finn ne; finn donn nou enn garson. Lotorite pou repoz lor so zepol e so nom Gran konseye, Bondie Toupwisan, Papa pou touzour, Prins lape.

⁶ So pouvwar pou propaze, e lape ki zame napa fini pou vinn lor tronn David e lor so rwayom. Li pou stabiliz so rwayote e pou rann li for, dan lazistis ek drwatir, aster la e pou touzour. LESEGNER Tou pwisan dan so gran pasion ki pou akonpli sa.

Zizman lor larogans ek lopresion

⁷ LESEGNER finn anvoy enn parol kont Zakob. Parol-la finn tom lor Izrael.

⁸ Tou pep pou konn sa. Efraim ek abitan Samari ki pe dir avek enn leker ranpli ar lorgey ek arogans:

⁹ “Bann blok finn tonbe, me nou pou konstrir avek bann ros taye. Bann pie sikomor finn koupe, me nou pou ranplas zot avek bann pie sed.”

¹⁰ Me LESEGNER finn soutenir lennmi Rason kont sa lepep la. Li finn eksit so bann lennmi.

¹¹ Aram dan Les, bann Filistin dan Lwes, zot finn devor Izrael avek zot labous. Akoz tousala, so koler pa finn kalme, so lame ankor lao.

¹² Me pep-la pa finn revinn ver seki ti pe tap li. Li pa finn rod LESEGNER Toupwisan.

¹³ Lerla, LESEGNER finn koup latet ek lake Izrael, brans palmie ek rozo dan enn sel zour.

¹⁴ Gran dimoun ek dimoun onorab, zot mem latet-la. Profet ki montre kouma koz manti, zot mem lake-la.

¹⁵ Bann gid sa pep-la finn fer li perdi, e bann ki zot finn gide, finn disparet.

¹⁶ Akoz samem LESEGNER pou nepli trouv so lazwa dan sa bann zennzan-la. Li pou nepli gagn pitie so bann orfelin ek so bann vev, parski zot tou bann foser e koripter. Tou labous nek koz ninport. Akoz tousala, so koler pa finn fini, so lame ankor leve.

¹⁷ Vremem, mesanste finn brile kouma enn dife. Li finn devor pikan ek zepinn. Li finn bril bann bwison dan lafore. Enn tourbiyon lafime pe fane partou.

¹⁸ Akoz debordman koler LESEGNER, later finn brile, e lepep koumadir finn pieze dan dife. Personn napa gagn pitie so frer.

¹⁹ Zot devor zot kamarad lor kote drwat, me zot gagn ankor fin. Zot devor dan kote gos, me zot pankor rasazie. Zot devor laser zot prop zanfan.

²⁰ Manase devor Efraim, Efraim devor Manase. Ansam zot atak Zida. Akoz tousala, so koler pa finn kalme, so lame ankor leve.