Izai 6 - Kreol Morisyen OT Portions

¹ Lane ki lerwa Ozias ti mor, mo ti gagn enn vizion. Dan mo vizion, mo finn trouv LESEGNER ki ti pe asize lor enn bel tronn ki ti drese bien ot. So rob ti telman long, li ti ranpli tanp-la.

² Bann anz ti lao li, sakenn ti ena sis lezel: de pou kasiet zot figir, de pou kasiet zot lipie, ek de pou anvole.

³ Zot ti pe kriye ant zot: “Sin Sin Sin LESEGNER Toupwisan! Later antie ranpli avek so laglwar”.

⁴ Zot lavwa ti pe fer bann laport tranble lor zot baz, tanp ti ranpli avek lafime.

⁵ Lerla mo dir: “Ayo maler lor mwa! Ala mo finn fini, parski mo enn zom avek lalev inpir! Mo res omilie enn pep avek lalev inpir e mo lizie finn trouv Lerwa LESEGNER Toupwisan.”

⁶ Enn parmi bann anz-la ti anvol dan mo direksion, e dan so lame li ti pran enn labrez avek enn pins depi lor lotel.

⁷ Li finn tous mo labous, e li dir: “Sa finn tous to lalev, to fot fini fonn e to pese efase.”

⁸ Lerla mo finn tann lavwa LESEGNER: “Kisann-la mo pou anvoye? Kisannla pou vinn nou portparol?” Mo reponn: “Ala mo la, anvoy mwa”.

⁹ Li dir: “Ale, al dir sa pep-la: “Zot pou bon tande, tande mem, zot pa pou konpran. Zot pou bon gete, gete mem, zot pa pou kone.”

¹⁰ Fer leker sa pep-la andirsi, fer zot zorey pa tande, zot lizie pa trouve. Tansion li trouve avek so lizie, e li tande avek so zorey. Pangar so leker konpran, ki li revini, e li geri.”

¹¹ Lerla mo dir: “Ziska kan Segner?” Li reponn: “Ziska seki bann lavil devaste, san okenn abitan, e personn dan lakaz. Ziska seki later devaste, vinn enn dezolasion.

¹² LESEGNER pou pous bann dimoun, e pei la antie pou abandone.

¹³ E mem si enn diziem revini, pou koup li kouma enn gran pie. Li pou kouma enn senn ki bisron finn abat. Res zis so rasinn, e sa rasinn-la, li enn semans ki sin.”