Izai 57 - Kreol Morisyen OT Portions

Lidolatri Izrael

¹ Bann dimoun drwat pe mor san ki personn pe gagn zot traka. Pe touy bann ki fidel. Personn pa konpran. Seki fidel pe vinn viktim bann move dimoun.

² Me lape pou vini. Bann ki mars dan sime drwat pou repoz lor zot lili.

³ Vinn la, zot, garson longanis, zot, desandan bann prostitie ek adilter .

⁴ Ar kisann-la zot pe zwe? Ar kisann-la zot pe fer grimas, zot pe tir lalang? Eski zot napa bann zanfan revolte, enn desandans bann manter?

⁵ Zot gagn relasion anba bann pie sakre, anba tou pie ki so fey ver, zot koup likou bann zanfan dan larivier, ant bann ros.

⁶ Parmi bann ros bien poli dan larivier, to ena to par. Sa mem sa, sa mem to rekonpans. Akoz zot, to finn vers bann topet pou to bann bondie, to finn fer to lofrand monte. Eski ar sa bann kiksoz-la ki mo koler pou kalme?

⁷ To finn met to lili lao lor montagn. Lamem ki to monte pou to fer to sakrifis.

⁸ Deryer laport avek so montan, to finn met to plak remersiman. To kasiet mwa pou to tir to linz. To finn monte, to finn fer plis plas lor to lili. To finn pran plezir ar to bann aman, to kontan dormi avek zot e admir zot lekor.

⁹ To finn ranpli twa ar delwil pou to al get lerwa, to finn met boukou parfin. To finn anvoy to bann mesaze bien lwin, fer zot desann ziska lemond bann mor.

¹⁰ Akoz sa kantite sime-la, to finn fatige, me to pa finn dir: “Ayo, gaspiyaz!” To finn retrouv lafors to lame, akoz samem to pa finn fatige.

¹¹ Kisann-la ki finn fer twa gagn per, pou ki to koz manti e pou to nepli rapel mwa; pou to nepli met mwa dan to leker? Sirman akoz sa ki to nepli respekte mwa.

¹² Me mo pou denons twa e seki to finn fer. Sa pa pou fer twa gagn okenn profi.

¹³ Ler zot kriye osekour, eski zot bann koleksion idol-la pou sap zot? Zot tou, divan pou pous zot, labriz pou trap zot. Me seki rod mo proteksion, pou gagn leritaz later, e li pou gagn mo montagn sin.

Led avek gerizon pe vini

¹⁴ Pou dir: “Ranze, ranze, tras enn sime. Tir tou obstriksion lor sime mo pep.

¹⁵ Ala seki Bondie Treo, ki so nom sin e ki viv pou leternite, pe dir: “Mwa, Bondie Sin, mo res lao, e osi avek bann dimoun ki dan lapenn, e avek seki finn abese. Tou bann ki finn abese, mo pou fer zot reviv Tou bann ki finn gagn kraze, mo pou redonn zot lavi.

¹⁶ Mo pa pou touletan res akiz zot mem. Mo pa pou res ankoler mem. Sinon, tou seki mo finn kre pou perdi souf lavi.

¹⁷ Izrael, mo ti ankoler akoz to perversion, e dan mo laraz, mo finn bat twa. Me to latet dir, e to finn persiste dan to move sime.

¹⁸ Mo finn trouv to move konportman. malgre sa, mo pou geri twa. Mo pou gid twa. Mo pou remet twa korek, twa ek bann ki an-dey avek twa.

¹⁹ Mo pou met enn sante louanz dan to labous: Lape! Lape pou seki lwin e pou seki pros, LESEGNER finn dir; e mo pou geri twa.

²⁰ Me bann zom ki move, zot kouma lamer ki azite, ki pa kapav kalme, e so bann vag lev lamar ek labou.

²¹ Pena lape pou bann zom ki move, mo Bondie finn dir.