Izai 51 - Kreol Morisyen OT Portions

Benediksion pou pep Bondie

¹ Tann mwa, zot ki pe rod lazistis, zot ki pe rod LESEGNER. Gete dan ki ros zot finn taye e dan ki karyer ros zot finn sorti.

² Get Abraam zot papa ek Sara ki finn met zot lor sa later la; parski li ti tousel kan mo finn apel li, mo finn beni li, e mo finn donn li boukou desandan.

³ Wi, LESEGNER pou konsol Sion, li pou konsol tou so bann rwinn. Li pou fer so dezer vinn enn zardin Eden, e so laplenn, enn zardin pou LESEGNER. Pou ena lazwa ek kontantman, aksiondegras ek son lamizik.

⁴ Pran kont mo pep! Mo pei, ekout mwa. Parski mo pe amenn enn lansegnman, e mo lazistis pou enn lalimier pou bann pep.

⁵ Mo lazistis finn koste, mo delivrans finn arive. Mo lebra pou diriz bann pep; bann zil pou met zot lesperans dan mwa e zot pou kont lor mo pwisans.

⁶ Lev zot lizie ar lesiel, get anba lor later. Wi, lesiel pou fane kouma lafime, later pou vinn vie kouma enn linz, e so bann abitan pou mor kouma mous. Me mo delivrans pou res pou touzour, e mo lazistis zame pou fonn.

⁷ Ekout mwa, zot ki konn lazistis, pep ki gard mo lalwa dan zot leker. Napa gagn per dezoner bann zom, napa les zot dekouraze par zot bann insilt.

⁸ Parski bebet pou manz zot kouma enn linz, e bann insek pou manz zot kouma lalenn. Me mo lazistis pou reste pou touzour, e mo delivrans pou dire, zenerasion apre zenerasion.

⁹ Leve! Leve! Lebra LESEGNER, servi to lafors. Leve kouma to ti leve letan lontan, pou bann zenerasion dan lepase. Pa tomem ki finn touy Raab, ki finn transpers dragon-la?

¹⁰ Pa tomem ki finn fer lamer, ek dilo dan gran fonder, vinn sek? Pa tomem ki finn fer enn sime dan fon lamer pou bann ki to finn libere?

¹¹ Bann ki LESEGNER finn libere pou revini. Ler zot pou ariv dan Sion, zot pou kriy zot lazwa. Lor zot figir pou ena enn lazwa ki zame pa pou fini. Lazwa ek kontantman pou akonpagn zot, soufrans ek larm pou sove ale.

¹² Momem to konsolater. Kifer to per bann mortel kouma twa, e bann imin ki pou disparet kouma lerb?

¹³ To bliye LESEGNER to kreater ki finn deroul lesiel, e ki finn poz fondasion later. To pa aret tranble toulezour divan gran koler sa dominer la, kan li met dir pou li kraz partou. Me kot koler sa diktater-la finn ale aster?

¹⁴ Bann prizonie ki dezespere, biento pou libere. Zot pa pou mor dan trou. Zot pa pou mank dipin.

¹⁵ Momem LESEGNER to Bondie ki fer lamer azite, ki fer so bann vag kraze. LESEGNER Toupwisan, samem so nom.

¹⁶ Mo finn met mo parol dan to labous. Dan lonbraz mo lame, mo finn kasiet twa. Pou mo deroul lesiel e pou mo fonn later, pou mo dir Sion: “Tomem mo pep.”

¹⁷ Leve, leve, diboute, Zerizalem! Twa ki finn bwar dan lame LESEGNER koup so lakoler. Enn kalis, enn koup vertiz ki to finn bwar ziska dernie gout, e ki fer twa balote.

¹⁸ Parmi to bann zanfan ki to finn met lor later, parmi tou bann zanfan ki to finn grandi, personn pa finn pran to lame pou gid twa.

¹⁹ Maler finn frap twa de par de: devastasion ek destriksion, lafaminn ek lager, kisann-la pou konsol twa? kisann-la pou redonn twa lespwar?

²⁰ To bann garson pe tom san konesans. Zot finn res dormi dan kwin sime. Kouma serf ki finn may dan file saser, zot finn paralize par lakoler LESEGNER, par menas to Bondie.

²¹ Akoz samem, ekout sa, twa ki dan maler, ki finn sou, me pa akoz divin.

²² Ala seki LESEGNER Bondie pe dir, to Bondie, defanser to pep: “Ala mo pe repran dan to lame koup ki donn vertiz, sa kalis, sa koup mo koler-la. To pou nepli bwar ladan ankor.

²³ Mo pou met li dan lame bann ki tourmant twa, bann ki ti pe dir twa: Bes twa! Les nou pase! E to finn kourbe pou fer to ledo vinn enn marspie, enn sime pou ki zot pase.”