Izai 5 - Kreol Morisyen OT Portions

Sante pie rezin ki napa raporte

¹ Les mo sant pou mo bon kamarad, enn sante lamour pou so karo rezin: Mo kamarad ti ena enn karo rezin lor enn kolinn fertil.

² Li finn fouye, li finn tir so bann ros, li finn plant enn zoli pie rezin, e li finn konstrir enn mirador omilie. Anplis, li finn fouy enn preswar. Li ti pe espere gagn bann zoli rezin me li finn gagn zis rezin amer.

³ Aster, zabitan Zerizalem, pep Zida, silvouple, port zot zizman ant mwa avek mo karo rezin.

⁴ Ki mo ti kapav fer ankor pou mo karo rezin e ki mo pa finn fer pou li? Mo ti pe espere gagn zoli zoli rezin, abe kifer li finn donn rezin amer?

⁵ Aster mo anvi fer zot kone seki mwa mo pou fer ar mo karo rezin. Mo pou tir so baraz, pou ki bann zanimo devor li, fer enn trou dan so lanklo, pou ki bann-la pil lor li.

⁶ Mo pou fer li vinn enn terin vag. Personn pa pou tay li, kiltiv li. Zepinn ek pikan pou pouse e mo pou donn lord niaz pa les lapli tom lor li.

⁷ Karo rezin LESEGNER Toupwisan, se pep Izrael, e karo ki li bien kontan, se zom ki res dan Zida. Li ti pe esper lazistis, me ki li finn trouve? Linzistis! Li ti pe esper drwatir, me ki linn tande? Malere pe kriye!

Denonsiasion linzistis sosial

⁸ Ayo maler pou bann ki mont lakaz lor lakaz, ki azout karo ar karo ziska nepli res okenn plas, res zis zot tousel abitan dan pei.

⁹ LESEGNER Toupwisan finn fer sa serman-la dan mo zorey: Ala vremem boukou gran-gran, zoli-zoli lakaz pou kraze. Zot pou res vid.

¹⁰ Parski trwa ektar karo rezin pou donn zis enn ti tono divin, e san kilo dible, pou donn zis dis kilo lafarinn.

¹¹ Ayo maler pou bann ki lev boner gramatin, pou galoup deryer boutey, ki kas poz ziska bien tar aswar, pou ki divin resof zot.

¹² Lagitar, laarp, tanbourin, laflit ek divin dan zot bann program bwar, me par kont, seki LESEGNER fer, sa zot napa pran kont; e kreasion so lame, zot pa trouve.

¹³ Akoz samem mo pep pou konn lexil. Akoz zot pa finn anvi kone. Bann gran-misie aster pe mordefin e so pep pe mordeswaf.

¹⁴ Akoz samem lagorz lamor finn ouver, li pou ouver so labous an-gran, ankor pli gran. Ki so gran-dimoun, ki so ti-dimoun, zot tou pou desann dan enn bel tapaz.

¹⁵ Limanite pou ploye, e zom pou abese. Bann vantar pou marse latet bese.

¹⁶ Pou trouv grander LESEGNER Toupwisan atraver so drwatir, e Bondie Sin pou montre ki li sin atraver so lazistis.

¹⁷ Bann mouton pou manze parey kouma dan zot bann patiraz, e bann agno pou manz dan bann rwinn.

¹⁸ Ayo maler pou bann ki ris lemal avek lakord mansonz e ki pe trenn dan pese kouma lakord diriz enn saryo.

¹⁹ Zot dir: “Degaze vit-vit fer travay la enn fwa, pou ki nou kapav trouve; Ki proze Bondie Izrael-la realize enn fwa, pou ki nou kapav konn li.”

²⁰ Ayo maler pou bann ki pran pa bon pou bon e ki pran bon pou pa bon, bann ki met nwarte dan plas lalimier e lalimier dan plas nwarte. Bann ki fer amer vinn dou, e dou vinn amer.

²¹ Ayo maler pou bann ki krwar ki zot saz, e deklar pli malin.

²² Ayo maler pou bann ki gayar pou bwar divin, e sanpion pou melanz labwason.

²³ Zot pran gous pou larg seki koupab, e pa fer lazistis pou bann inosan.

Invazion bann etranze ape vini

²⁴ Akoz samem zot rasinn pou deperi kouma kadav, parey kouma laflam manz lapay e dife manz lerb sek. Zot bann fler pou fane kouma lapousier parski zot finn rezet instriksion LESEGNER Toupwisan, e zot finn mepriz bann koze Bondie Izrael.

²⁵ Akoz samem koler LESEGNER finn anflame kont so pep. Li finn lev so lame kont li. Li finn tap li e bann montagn finn tranble. Zot kadav kouma salte dan milie sime. Akoz tousala, so koler pa finn kalme, so lame ankor lao.

²⁶ Li signal enn pep ki lwin e li sifle kat kote later pou apel li. Alala, pep-la pe vini, vit-vit kouma zekler!

²⁷ Kot bann-la, personn napa feb, personn napa maye, tonbe, personn napa gagn somey, zot tou zot sintir bien atase, e zot sandalet napa large.

²⁸ Zot bann fles finn fite pwint, e tou zot bann ark finn pare pou vize. Bann sabo zot bann souval parey kouma ros, e zot bann larou kouma enn siklonn.

²⁹ Zot kriye parey kouma enn lion. Kouma enn ti-lion, zot kriye. Zot grogne, e kan zot finn trap enn viktim, personn pa kapav fer zot larg li.

³⁰ Zot pou grogne kont li sa zour-la, parey kouma tapaz lamer. Ler get later, nek ena marenwar ek langwas, lalimier vinn som ar gro-gro niaz.