Izai 3 - Kreol Morisyen OT Portions

¹ LESEGNER, Bondie Toupwisan, pe retir dan Zerizalem e dan Zida tou resours ek provizion, tou zot stok dipin ek dilo.

² Bann gerye, bann ziz e bann profet, bann deviner e bann ansien,

³ bann kapitenn e bann gran dimoun, bann konseye e bann saz, bann mazisien e bann longanis.

⁴ Mo pou fer bann zenes vinn zot bann sef. Bann ti zanfan pou gouvern zot.

⁵ Dimoun pou lager ant zot. Ant vwazin, pou ena bel deboulman. Bann zenn pou lev ar gran dimoun. Bann ti dimoun pou lev ar bann gran-misie.

⁶ Enn zom pou mem trap so frer dan lakaz so papa e pou dir li: “To ena enn manto, abe vinn nou sef alor. Tomem responsab sa bann lakaz kraze la”.

⁷ Sa zour-la, li pou leve pou li dir: “Mo pa enn dokter, dan mo lakaz pena dipin ek manto, napa fer mwa vinn sef lepep.”

⁸ Zerizalem finn maye e Zida finn tonbe. Akoz seki zot dir ek seki zot fer kont LESEGNER, zot pena okenn respe pou so grander ek so pwisans.

⁹ Zot figir mem fini kondann zot. Zot pa per pou tal zot pese parey kouma Sodom, zot pa finn kasiet nanye. Maler lor zot, parski zot finn fer zot prop maler!

¹⁰ Dir: Bienere seki fer lazistis parski li pou manz fri so bann aksion.

¹¹ Ayo maler pou seki fer lemal, parski li pou gagn maltrete dapre so bann prop aksion.

¹² Ayo mo pep! Bann zanfan pe met dir ar li, bann madam pe dominn li. To bann gid pe kondir twa dan perdision. e zot finn fer twa pran move sime.

¹³ LESEGNER pe leve pou li akize, li finn diboute, pou li ziz lepep.

¹⁴ LESEGNER vinn ziz bann ansien, so pep avek so bann sef: “Zot finn bril karo rezin. Seki zot finn kokin ar dimoun mizer, li dan zot lakaz.

¹⁵ Ki drwa zot ena pou kraz mo pep e defigir bann pov?” Ala LESEGNER Toupwisan finn koze.

¹⁶ LESEGNER dir: “Parski bann tifi Sion, zot alert e zot fer agreab, zot marse tipa-tipa pou fer sonn laklos dan zot lipie,

¹⁷ LESEGNER pou fer latet bann tifi Sion ranpli ar lagal e pou fer zot fron vinn touni.”

¹⁸ Sa zour la, LESEGNER pou tir bann akseswar: ti laklos, medayon,

¹⁹ pandantif, brasle, vwal

²⁰ foular, brasle pou lipie, sintir, parfin ek tabiz

²¹ bag, piersing,

²² linz maryaz, kaskol, chal, sakos,

²³ laglas, chouridar, sapo, sari.

²⁴ Enn loder pouritir pou ranplas loder parfin. Dan plas enn sintir, pou gagn enn lakord. Dan plas enn zoli kwafir, latet pou raze. Dan plas enn zoli kostim, pou met enn sak goni. Dan plas zoli-zoli batman, pou ena enn mark fer rouz. Laont sa!

²⁵ Zerizalem, to bann zom pou tonbe ar kout lepe. To bann gerye pou mor dan lager.

²⁶ Lavil antie pou plengne e pou an-dey, to pou touni, to pou asiz anba.