Izai 26 - Kreol Morisyen OT Portions

Zida sant laviktwar

¹ Sa zour-la pou sant sa kantik la dan pei Zida: “Nou ena enn lavil bien proteze, LESEGNER finn met miray ek ranpar pou protez nou.

² Ouver laport: les lepep ki fidel rantre, pei ki viv lazistis.

³ Seki tini ferm, to garanti li lape, parski li finn met so konfians dan twa.

⁴ Fer konfians LESEGNER pou touzour parski LESEGNER enn ros solid pou leternite.

⁵ Limem ki finn ranvers bann ki ti res lao, li finn abes lavil ki ti dan oter, li finn desann li ziska later, e finn fer li manz lapousier.

⁶ Lavil-la pou vinn enn marspie, lipie bann pov, lipie bann feb pou mars lor li.

⁷ Sime-la drwat pou seki fer lazistis. To dres enn larout bien drwat pou seki fer lazistis.

⁸ Vremem SEGNER, nou pe esper twa lor sime ki to finn komann nou pou pran. Mo nam pe dezir twa, pe apel twa, pe kriye to nom.

⁹ Dan lanwit, mo nam pe gagn swaf to prezans. Mo lespri, mo leker, pe rod twa. Kan to pronons to zizman dan sa lemond-la, bann abitan later aprann lazistis.

¹⁰ Me si nou gagn pitie pou bann move dimoun, zame zot pa pou aprann seki zis. Zot pratik lemal, mem dan pei kot sipoze ena lazistis. Zot refiz rekonet grander LESEGNER.

¹¹ SEGNER, to lame finn leve, e zot napa trouve! Les zot trouv laflam ki to ena pou to pep, zot ava gagn onte. Les dife ki to finn prepare pou to bann lennmi bril zot.

¹² SEGNER, to pou donn nou lape. Wi, tomem ki finn permet nou fer tou seki nou finn fer.

¹³ SEGNER nou Bondie, bann lezot sef finn dominn nou; me zis to nom tousel, nou rekonet.

¹⁴ Bann mor napa pou reviv, lonbraz napa pou leve, parski to finn pini zot, to finn detrir zot, to finn fer zot disparet dan memwar bann dimoun.

¹⁵ To finn fer nou pei grandi, SEGNER. Wi nou pei finn grandi, e to finn gagn laglwar. To finn elarzi frontier nou pei.

¹⁶ SEGNER, dan zot maler, zot finn rod twa. Zot finn priye twa kan to pinision ti lor zot.

¹⁷ Nou ti divan twa, SEGNER, kouma enn madam ansint ki pe soufer e ki pe kriye kan li bizin akouse.

¹⁸ Nou osi nou sipoze donn lavi. Nou finn soufer. Me kan gete koumadir nou finn prodir zis divan. Nou pa finn amenn enn delivrans lor pei, pena okenn nouvo abitan lor later.

¹⁹ To bann mor pou reviv, zot kadav pou resisite. Leve, sante, zot ki res dan lapousier, parski to laroze enn laroze lalimier, e later pou redonn lavi bann mor.

²⁰ Ale mo pep, rant kot twa. Ferm to laport; kasiet ankor inpe letan, ziska koler LESEGNER pase.

²¹ Gete! Ala LESEGNER pe sorti dan so plas pou li pini pese bann abitan later. Later pou montre disan ki finn koule lor li. Li pou aret kasiet bann viktim ki finn mor.