Izai 12 - Kreol Morisyen OT Portions

Aksiondegras ek louanz

¹ Sa zour-la to pou dir: “Mo rann twa gras SEGNER parski to ti ankoler kont mwa, me to koler finn kalme, e to finn konsol mwa.

² Alalila, limem Bondie mo sover! Mo ena konfians, e mo nepli tranble parski LESEGNER, limem mo lafors e mo pwisans. Limem ki finn sov mwa.”

³ Dan enn gran lazwa, zot pou pran dilo dan lasours delivrans.

⁴ Sa zour la, zot pou dir: “Selebre LESEGNER, proklam so nom, fer konn bann gran kiksoz ki li finn fer dan bann pei. Rapel kouma li gran.”

⁵ Sant enn bann sante pou LESEGNER parski li fer bel-bel kiksoz. Fer later antie konn sa.

⁶ Kriye! Kriy to lazwa, twa ki res lor montagn Sion. Parski Bondie Izrael li gran, e li viv la, akote twa.