Izai 11 - Kreol Morisyen OT Portions

Rwayom lape

¹ Enn ti brans pou sorti dan tron Zese. Enn ti bourzon pou sorti dan so rasinn.

² Lor li, Lespri LESEGNER pou repoze: Lespri lasazes e disernman, lespri konsey ek lafors, lespri konesans ek lakrint LESEGNER.

³ Li pou trouv so linspirasion dan lakrint LESEGNER. Li napa pou zize apre seki so lizie trouve. Li napa pou pran desizion apre seki so zorey tande.

⁴ Li pou ziz bann feb dapre lalwa. Li pa pou get ar de lizie kan li ziz bann pov ki dan pei. So parol, kouma enn baton, pou koriz pei-la. Li pou touy seki move avek lesouf so labous.

⁵ Lazistis pou vinn enn sintir otour so lerin. Fidelite pou antour so laans.

⁶ Loulou pou res avek ti-kabri. Leopar pou dormi pre kot ti-sev. Piti bef ek piti lion pou manz ansam, enn ti garson pou kondir zot.

⁷ Vas avek lours pou gagn mem patiraz. Zot piti pou dormi kotakot. Ki so lion, ki so bef, pou manz lapay.

⁸ Ti-baba pou amiz li lor nik kobra. Ti-zanfan pou met so lame lor lakaz serpan.

⁹ Pa pou ena lemal, pa pou ena destriksion lor mo montagn sin, parski pei-la pou ranpli avek konesans LESEGNER, parey kouma kan lamare monte.

Retour bann ki ankor vivan dan Izrael e Zida

¹⁰ Sa zour-la, rasinn Zese pou vinn enn signal pou tou bann pei. Bann pep pou rod li, e so lakaz pou konn laglwar.

¹¹ Pou arive sa zour la, ki LESEGNER pou lev so lame ankor enn fwa pou liber leres so pep, bann ki res dan Lasiri, Lezip, Patros, Kous, Elam, Sinear, Amat e dan bann zil.

¹² Li pou donn enn signal pou bann pei, li pou rasanble bann exile Izrael, li pou reini bann ki finn disperse depi Zida pou al kat kote later.

¹³ Zalouzi Efraim pou arete. Bann lennmi Zida pou mor. Efraim pou nepli zalou Zida, e Zida pou nepli persekit Efraim.

¹⁴ Kote Lwes, zot pou fransi, desann bann kolinn, lor bann Filistin. Ansam zot pou fer piyaz kot bann ki res dan Les. Zot pou anvoy zot lame lor Edom ek Moab. Bann garson Amon pou vinn zot esklav.

¹⁵ LESEGNER pou fer labe lamer lezip vinn sek. Ar so lame, li pou aret larivier. Par pwisans so lesouf, li pou diviz larivier-la an set lebra. Lerla pou kapav travers zot ar savat.

¹⁶ Pou ena enn gran larout pou leres so pep ki res dan Lasiri. Parey kouma pou Izrael sa zour kot li ti kit pei Lezip la.