Izai 10 - Kreol Morisyen OT Portions

¹ Ayo maler pou bann ki fer bann regleman inzis, pou bann ki ekrir lalwa pou kraz dimoun.

² Zot anpes bann ki feb gagn lazistis, zot pa les bann ti-dimoun dan mo pep viv dapre zot drwa. Zot devaliz bann vev, e zot abiz bann orfelin.

³ Ki zot pou fer kan mo pou pini zot? Ler maler pou sort depi lwin pou vini, kot kisann-la zot pou ale pou rod sekour? Kot zot pou les zot bann rises?

⁴ Kouma zot pou fer pou pa mars kat pat ansam avek bann prizonie? E ki manier zot pou fer pou ki zot pa tom ansam avek bann ki finn asasine? Akoz tousala, so koler pa finn kalme, so lame ankor leve.

Zizman kont larogans Asiri

⁵ Ayo maler lor Asour, limem rotin mo koler. Baton ki dan so lame, ar samem mo pou montre mo laraz.

⁶ Mo pe anvoy li kont enn pei infidel. Kont lepep ar ki mo ti ankoler, mo pe anvoy li. Pou depouy zot e pou pran tou zot dibien. Pou pietinn zot kouma labou dan sime.

⁷ Me li, Asour, li pa ti pe mazinn sa koumsa. So leker pa ti gagn sa panse la, parski li ti pe pans zis pou detrir. Li ti anvi exterminn otan pei ki kapav.

⁸ Li ti pe dir: “Eski li pa vre ki tou mo bann sef bann lerwa?

⁹ Eski li pa vre ki Kalno parey kouma Karkemis? Ki Amat parey kouma Arpad? E ki Samari parey kouma Damas?

¹⁰ Mo finn kapav met lame lor rwayom bann fos bondie, kot ena plis idol ki kot Zerizalem ek Samari.

¹¹ Gete ki mo finn fer kont Samari ek so bann fos bondie. Eski mo pa pou fer parey kont Zerizalem ek so bann stati?”

¹² Me kan LESEGNER pou fini tou so travay lor montagn Sion e Zerizalem, li pou pini lerwa Asour akoz so gran lorgey e so regar arogan.

¹³ Parski lerwa-la finn dir: “Akoz mo lame li pwisan ki mo finn reisi fer sa. Akoz mo sazes. Parski mo finn azir avek lintelizans. Mo finn anlev bann frontier ant bann pep. Mo finn kokin zot bann trezor. Kouma enn pwisan, mo finn tir bann lerwa lor zot tronn e mo finn zet zot anba.

¹⁴ Parey kouma nou avoy lame lor enn nik, mo finn pran tou rises bann pep. Kouma nou ramas bann dizef abandone, mo finn ramas tou seki ti lor later; pa enn sel finn bat so lezel, pa enn finn ouver so labek pou dir kiksoz.”

¹⁵ Eski lars kapav fer vantar ar seki pe servi li? Eski lansar kapav fer gran-nwar ar seki pe servi li? Pena sime enn rotin bouz lebra seki pe lev li; oubien enn dibwa diriz lame seki pe tini li!

¹⁶ Akoz samem Lesegner, BONDIE Toupwisan pou fer zot bann teritwar gra vinn meg-meg. Zot bote ek zot laglwar pou brile kouma dife bril partou.

¹⁷ Lalimier Izrael pou vinn enn dife, e so Bondie pou vinn laflam. Li pou brile e pou manz so bann pikan ek so bann rons dan enn sel zour.

¹⁸ Li pou fini net so bann lafore bien ver ek so plantasion. Li pou kouma enn dimoun malad ki pe deperi.

¹⁹ Bann pie ki reste dan so lafore sitan pou tigit, ki mem enn zanfan pou kapav kont zot.

Konversion bann sirvivan Izrael

²⁰ Sa zour la, leres Izrael ek bann ki ti ankor vivan dan lepep Zakob pou aret apiy zot lor bann ki tap zot. Zot pou apiy vremem lor LESEGNER, Bondie Izrael.

²¹ Enn restan pou revini, reskape pep Zakob pou revinn kot Bondie pwisan Izrael.

²² Ayo Izrael, mem si to pep ti boukou parey kouma disab dan bor lamer, zis enn ti restan ki pou revini. Destriksion finn deside, lazistis pou deborde kouma larivier.

²³ Wi, Lesegner, BONDIE Toupwisan finn fini desid pou amenn destriksion dan sa pei-la antie.

²⁴ Akoz samem Lesegner, BONDIE Toupwisan pe koze: “Ayo mo pep ki pe res dan Sion, napa gagn per Asour! Li bat twa avek enn baton, li lev so matrak kont twa lor sime Lezip.

²⁵ Me ankor enn tigit letan, mo pou aret ankoler kont twa. Mo pou detrir to lennmi.”

²⁶ LESEGNER Toupwisan pou lev so fwet kont Lasiri, parey kouma li frap Madian kot montagn Oreb. li pou lev so baton kont lamer, kouma li ti fer kont Lezip.

²⁷ Sa zour la, li pou tir sa pwa-la pou lor to zepol. Li pou kraz sa fardo ki lor to likou-la.

²⁸ Zot finn ariv lor Ayat, zot finn pas Migron, zot finn les so bagaz Mikmas.

²⁹ Zot finn pas dan gorz, zot finn pas lanwit dan Geba, Bann abitan Rama pe tranble, bann ki res Gibea, pei Sail pe sove.

³⁰ Abitan Galim, plore for-for, fer atansion Lisha! Reponn li, Anatot!

³¹ Bann abitan Madmena pe sove; bann abitan Gebim pe kasiet.

³² Sa zour-la, lennmi pou aret dan lavil Nob, li pou lev koutpwin pou menas montagn Sion, kolinn Zerizalem.

³³ Ala ki LESEGNER Toupwisan pe koup bann brans avek violans, li pe abat bann pie ki pli gran, li pe zet bann zarb ki pli ot anba.

³⁴ Pou koup bann touf lafore kout lars. Bann zoli pie Sed Liban pou tom anba.