Zn 2 - Nouvo Testaman Kreol Morisien Harmonisation NTPS KM

Maryaz dan Kana

¹ Trwaziem zour mision Zezi, ti ena enn maryaz dan Kana ki ti dan Galile. Mama Zezi ti la.

² Zezi ek so bann disip osi ti invite dan maryaz-la.

³ Ler divin fini, mama Zezi dir li, “Zot nepli ena divin.”

⁴ Zezi dir li, “Fam, ki to oule ar mwa? Mo ler pankor vini.”

⁵ So mama dir bann server, “Fer tou seki li pou dir zot fer.”

⁶ Ti ena la, sis resipian an-ros ki bann Zwif ti servi pou zot pirifikasion. Dan sak resipian ti kapav met apepre ant vin ek trant galon.

⁷ Zezi dir zot, “Plin sa bann resipian-la ar dilo.” Zot ranpli tou ziska dan rebor.

⁸ Apre sa, li dir zot, “Pran inpe, al donn responsab fet-la.” Alors, zot al donn li.

⁹ Kan li finn gout dilo ki finn vinn divin la, (li pa ti kone kot sa sorti; nek server ki ti kone), responsab fet apel nouvo marye.

¹⁰ Li dir li, “Tou dimounn servi bon divin dabor, kan invite finn bien bwar, lerla servi divin mwin bon; me twa, to finn gard bon divin ziska aster-la.”

¹¹ Samem premie sign Zezi ti fer. Sa ti pas dan Kana dan Galile; li finn montre so laglwar e so bann disip finn krwar dan li.

¹² Apre sa, li desann Kafarnaom ansam avek so mama, so bann frer ek so bann disip. Zot finn res laba de-trwa zour.

Zezi netway Tanp prop

¹³ Kouma Pak bann Zwif ti pe koste, Zezi mont Zerizalem.

¹⁴ Dan Tanp, li trouv marsan bef, mouton ek pizon ansam avek bann ki ti pe fer zot biznes sanz larzan.

¹⁵ Li fer enn fwet avek lakord, li pous zot tou andeor Tanp avek zot mouton, zot bef, li voltiz zot kas e li devir zot latab anba-lao.

¹⁶ Li dir bann marsan pizon, “Tir tousala deor; pa fer lakaz mo papa vinn enn bazar.”

¹⁷ Lerla so bann disip rapel Parol Lekritir, “Lamour pou to lakaz pou devor mwa kouma laflam.”

¹⁸ Lerla bann Zwif kestionn li, “Ki sign to kapav montre nou, pou permet twa fer seki to pe fer?”

¹⁹ Zezi reponn zot, “Kraz sa Tanp-la, dan trwa zour mo pou remet li debout.”

²⁰ Lerla bann Zwif dir li, “Finn bizin karann-sis banane pou mont sa Tanp-la. Twa, to pou remet li debout dan trwa zour?”

²¹ Me li, li ti pe koz lor tanp so lekor.

²² Akoz samem, kan li finn leve parmi bann mor, so bann disip ti rapel so parol e zot finn krwar dan Lekritir ek dan parol ki Zezi finn dir.

Zezi konn leker dimounn

²³ Sa bann zour-la, Zezi ti dan Zerizalem pou fet Pak. Boukou dimounn ti krwar dan so nom, ler zot finn trouv bann sign ki li ti pe fer.

²⁴ Me Zezi pa ti fer zot konfians parski li ti konn leker dimounn.

²⁵ Zezi pa ti bizin temwaniaz personn pou kone kouma dimounn ete, parski li ti kone ki ena dan leker dimounn.