Zn 18 - Nouvo Testaman Kreol Morisien Harmonisation NTPS KM

Arestasion Zezi

¹ Apre sa bann parol-la, Zezi sorti avek so bann disip. Li sot larivier Sedron, li rant dan enn zardin avek so bann disip.

² Zida, ki pou trayir Zezi, ti konn sa landrwa-la li osi parski Zezi ti vinn la souvan avek so bann disip.

³ Zida vinn avek enn larme solda ek bann gard ki bann gran pret ek bann Farizien finn donn li; zot ti ena lalanp ek flanbo e zot ti arme ar gourdin.

⁴ Zezi ti konn tou seki ti pou ariv li; li vinn devan zot e li demann zot, “Kisann-la zot pe rode?”

⁵ Zot reponn, “Zezi Nazaret.” Li dir zot, “Mwa sa.” Zida, ki pou trayir Zezi, ti pe debout la avek zot.

⁶ Kouma li dir zot, “Mwa sa”, bann-la kil deryer e zot tom anba.

⁷ Zezi redemann zot ankor, “Kisann-la zot pe rode?” Zot dir, “Zezi Nazaret.”

⁸ Zezi reponn zot, “Mo finn dir zot, mwa sa; si momem ki zot pe rode, les bann-la, ale.”

⁹ Lerla parol ki finn dir realize, “Mo pa finn perdi personn ki to finn konfie mwa.”

¹⁰ Simon Pier pran lepe ki ti ar li, donn serviter gran pret enn kout lepe e koup so zorey drwat. Serviter-la ti apel Malkis.

¹¹ Zezi dir Pier, “Remet to lepe dan so fouro; eski mo pa pou bwar koup ki mo Papa finn donn mwa?”

Zot amenn Zezi devan Ann

¹² Alors enn larme solda ek so komandan ek gard Zwif aret Zezi. Zot atas li.

¹³ Zot amenn li devan Ann premie kout. Ann ti boper Kaif ki ti gran pret sa lane-la.

¹⁴ Kaif mem ki finn konsey bann Zwif, “Li preferab pou zot ki enn sel dimounn mor pou tou lepep.”

Pier renie Zezi premie fwa

¹⁵ Simon Pier ek enn lot disip ti pe swiv Zezi. Gran Pret ti konn disip-la, akoz samem li finn les li rant avek Zezi dan lakour.

¹⁶ Me Pier ti pe debout deor devan laport. Disip ki gran pret ti kone la sorti deor, koz ar fam ki ti pe vey laport-la e disip-la fer Pier rantre.

¹⁷ Fam-la dir ar Pier, “Eski twa osi to pa enn disip sa boug-la?” Li reponn, “Mwa? Non.”

¹⁸ Bann serviter ek bann gard ti pe deboute. Zot finn alim enn dife parski ti pe fer fre. Pier ti la ar zot e li osi ti pe sof dife.

Gran Pret kestionn Zezi

¹⁹ Alors gran pret poz Zezi kestion lor so bann disip e lor so lansegnman.

²⁰ Zezi reponn li, “Mo finn koz devan tou dimounn lor later; mo finn ansegn touletan dan sinagog e dan Tanp, la kot tou bann Zwif rasanble; zame mo finn kasiet pou koze.

²¹ Kifer to poz mwa sa bann kestion-la? Al demann bann dimounn ki finn vinn ekout mwa; zot va dir twa ki mo finn dir zot; zot konn bien seki mo finn dir.”

²² Letan bann-la tann sa parol-la, enn gard ki ti la donn Zezi enn kalot. Li dir Zezi, “Enn manier pou koz ar gran pret sa?”

²³ Zezi reponn li, “Si mo koze pa bon, montre mwa seki pa bon. Me si mo koze bon, kifer to bat mwa?”

²⁴ Alors Ann avoy Zezi devan Kaif ki ti gran pret. Zezi ti touzour atase.

Pier renie Zezi ankor

²⁵ Letan sa, Simon Pier ti pe deboute e li ti pe sof dife. Bann-la demann li, “Eski twa osi to pa enn so bann disip?” Li renie Zezi e li dir, “Mwa? Non.”

²⁶ Enn serviter gran pret, fami boug ki Pier ti koup so zorey la, dir, “Eski mo pa finn trouv twa dan zardin avek li?”

²⁷ Ankor enn fwa, Pier renie. Lerlamem kok sante.

Zezi devan Pilat

²⁸ Boner gramatin, zot pran Zezi kot Kaif e zot amenn li devan pale gouverner. Zot pa rant dan pale pou ki zot pa vinn inpir e pou ki zot kapav manz repa Pak.

²⁹ Akoz samem Pilat sorti deor e vinn get zot. Li demande, “Ki sarz zot ena kont sa boug-la?”

³⁰ Zot dir, “Nou pa ti pou amenn li devan twa, si li pa ti enn malfeter.”

³¹ Pilat reponn, “Pran li zotmem, ziz li dapre zot lalwa.” Bann Zwif dir, “Dapre nou lalwa nou pa gagn drwat tir lavi dimounn.”

³² Lerla parol Zezi realize kan li ti pe dir ki manier li ti pou mor.

³³ Ankor enn fwa, Pilat rant dan so pale, li apel Zezi e li dir, “Eski to lerwa Zwif, twa?”

³⁴ Zezi reponn, “Seki to pe dir lor mwa, eski to pe dir sa par to prop lide ou bien lot dimounn finn dir twa?”

³⁵ Pilat dir, “Eski mo enn Zwif mwa? To prop dimounn ek bann gran pret finn livre twa ar mwa; ki to finn fer koumsa?”

³⁶ Zezi reponn, “Mo Rwayom pa lor later; si mo Rwayom ti lor later, mo bann gard ti pou lager pou mwa, pou ki bann-la pa livre mwa ar bann Zwif. Me vremem, mo Rwayom pa isi.”

³⁷ Lerla Pilat dir, “Alors to enn lerwa?” Zezi reponn, “Twa ki pe dir. Mo finn ne, mo finn vinn dan lemond pou enn sel rezon: rann temwaniaz laverite. Tou dimounn ki dan laverite, ekout mo lavwa.”

³⁸ Pilat demann Zezi, “Ki ete laverite?” Apre sa dialog-la, Pilat sorti deor ankor enn fwa; li al get bann Zwif e li dir zot, “Mo pa trouv okenn rezon pou kondann li.

Zezi kondane amor

³⁹ Dapre zot koutim, mo abitie larg enn prizonie pou Pak; eski zot oule mo larg lerwa Zwif?”

⁴⁰ Zot tou kriye, “Non, pa li! Larg Barabas.” Barabas ti enn bandi.