Zn 16 - Nouvo Testaman Kreol Morisien Harmonisation NTPS KM

Lemond ayir bann disip

¹ “Mo finn dir zot tousala pou ki zot pa abandonn zot lafwa.

² Bann-la pou met zot deor dan sinagog. Me ler pe vini kot dimounn, ki pou touy zot, pou krwar ki zot pe servi Bondie kan zot pe fer sa,

³ parski zot pa finn konn ni mo Papa, ni mwa.

⁴ Me mo pe dir zot sa, pou ki kan ler vini, zot rapel seki mo finn dir zot. Mo pa finn dir zot tousala depi koumansman parski mo ti avek zot.

Travay Lespri

⁵ Me aster-la mo pe al kot Sa-Enn ki finn avoy mwa la e personn pa demann mwa, ‘Kot to pe ale?’

⁶ Me zot leker fermal parski mo finn dir zot sa.

⁷ Me mo pe dir zot laverite, li dan zot lavantaz ki mo ale; parski si mo pa ale, Sa-Enn ki pou defann zot la, pa pou vinn ar zot; me si mo ale, mo pou avoy li.

⁸ Kan li vini, li pou prouve ki lemond pa kone ki ete pese, lazistis ek zizman.

⁹ Bann-la dan pese parski zot pa krwar dan mwa;

¹⁰ Ki ete lazistis? Mo pe al kot mo Papa e zot nepli pou trouv mwa ankor;

¹¹ Ki ete zizman? Sef lemond finn fini zize.

¹² Mo ena ankor boukou kiksoz pou dir zot me li tro lour pou zot, aster-la;

¹³ Kan Lespri laverite vini, li pou kondir zot dan laverite. Li pa pou koz dapre so prop lide, me tou seki li finn tande, samem li pou dir; li pou anons zot tou seki pou vini.

¹⁴ Li pou rann mwa glwar parski li pou anons zot tou seki li finn resevwar ar mwa.

¹⁵ Tou seki mo Papa ena, li pou mwa; akoz samem mo finn dir zot, ki Lespri pou anons zot seki li finn resevwar ar mwa.

Zot sagrin pou disparet

¹⁶ Dan enn tigit letan zot nepli pou trouv mwa e dan enn tigit letan ankor, zot pou retrouv mwa.”

¹⁷ De-trwa so bann disip ti pe demande ant zot, ki savedir “Enn tigit letan zot pa pou trouv mwa e dan enn tigit letan ankor, zot pou retrouv mwa?” E ki savedir “Mo pe al kot mo Papa?”

¹⁸ Alors zot dir, “Ki savedir ‘enn tigit letan?’ Nou pa konpran sa koze-la.”

¹⁹ Zezi ti kone ki zot ti pe anvi kestionn li; alors li dir zot, “Zot pe rod konpran ki savedir, ‘Enn tigit letan zot pa pou trouv mwa e dan enn tigit letan ankor zot pou retrouv mwa?’

²⁰ Vremem, laverite mo dir zot: zot pou plore, zot pou kriye me lemond pou dan lazwa. Zot pou dan lapenn me zot lapenn pou vinn lazwa.

²¹ Kan enn fam pre pou akouse, li dan lasoufrans parski so ler finn vini; me kan zanfan-la ne, li nepli pans so douler me li dan lazwa parski so zanfan finn vinn dan lemond.

²² Aster-la zot dan lapenn me kan mo pou retrouv zot ankor, zot leker pou dan lazwa e personn pa pou kapav retir sa lazwa-la ar zot.

²³ Kan sa zour-la vini, zot nepli pou poz mwa okenn kestion; vremem, laverite mo dir zot, tou seki zot demann mo Papa lor mo nom, li pou donn zot.

²⁴ Ziska aster-la, zot pa finn demann nanye lor mo nom; demande, zot pou resevwar, lerla zot pou ranpli ar lazwa.

Mo pli for ki lemond

²⁵ Mo finn koz ar zot an parabol; me ler pe vini kot mo nepli pou koz an parabol me mo pou direk ar zot, ler mo koz lor mo Papa

²⁶ Sa zour-la, zot pou demann kiksoz mo Papa lor mo nom, san ki mo ena pou koz pou zot.

²⁷ Mo Papa bien kontan zot parski zot finn kontan mwa e zot finn krwar ki mo sorti kot Bondie.

²⁸ Mo sorti kot mo Papa e mo finn vinn dan lemond; mo pe kit lemond e mo pe retourn kot mo Papa.”

²⁹ So disip dir, “Aster to direk ar nou e to nepli koz an parabol.

³⁰ Aster nou kone ki to konn tou kiksoz e ki pa bizin poz twa kestion; akoz samem nou krwar to sorti kot Bondie.”

³¹ Zezi dir, “Eski zot krwar aster-la?

³² Gete, ler pe vini, ler finn fini vini, kot zot pou disperse e kot sakenn pou retourn kot li. Zot pou les mwa tousel, me mo pa tousel parski mo Papa touzour avek mwa.

³³ Mo finn dir zot tousala pou zot gagn lape an mwa. Lemond pou fer zot soufer; me gard kouraz, mo finn sorti vinker lor lemond.”