Zn 15 - Nouvo Testaman Kreol Morisien Harmonisation NTPS KM

Zezi vre pie rezin

¹ “Mwa, mo vre pie rezin, mo Papa, proprieter karo.

² Tou brans ki lor sa pie-la e ki pa raporte, mo Papa tir zot zete; me tou brans ki raporte, li tay zot pou ki zot donn ankor plis.

³ Zot finn deza pirifie par parol ki mo finn dir zot.

⁴ Res ar mwa, kouma mwa mo res ar zot. Parey kouma enn brans pa kapav raport fri si li pa res lor pie rezin-la, zot osi, zot pa pou kapav fer nanye si zot pa res ar mwa.

⁵ Mwa, mo pie rezin e zot, zot bann brans. Dimounn ki res ar mwa e mwa ar zot, zot pou raport enn kantite fri parski san mwa zot pa kapav fer nanye.

⁶ Si kikenn pa res ar mwa, pou zet li deor parey kouma fer ek enn brans ki pa raporte; lerla li pou sek. Dimounn ramas sa bann brans-la, zet zot dan dife e zot brile.

⁷ Si zot res ar mwa e mo parol res ar zot, tou seki zot demande zot pou gagne.

⁸ Mo Papa glorifie, ler zot raport boukou fri e ler zot vinn mo bann disip.

⁹ Kouma mo Papa kontan mwa, mwa osi mo kontan zot. Res dan mo lamour.

¹⁰ Si zot gard mo bann komannman, zot pou res dan mo lamour parey kouma mwa, mo gard komannman mo Papa e mo res dan so lamour.

¹¹ Mo finn dir zot tousala pou ki mo lazwa res dan zot e ki zot lazwa konple dan enn gran lazwa.

¹² Ala mo komannman, kontan zot prosin, parey kouma mwa mo kontan zot.

¹³ Pena pli gran lamour ki existe ler kikenn donn so lavi pou so bann kamarad.

¹⁴ Zot mo bann kamarad si zot fer tou seki mo komann zot.

¹⁵ Mo nepli apel zot serviter, parski enn serviter pa kone ki so met fer; mo apel zot kamarad, parski tou seki mo finn tande kot mo Papa, mo finn fer zot kone.

¹⁶ Pa zot ki finn swazir mwa, me mwa ki finn swazir zot. Mo finn donn zot mision, ale, raport fri e ki zot fri dire. Lerla tou seki zot demann mo Papa lor mo nom, li pou donn zot.

¹⁷ Mo donn zot enn komannman: kontan zot prosin.

Lemond pou ayir zot

¹⁸ Kan lemond pou ayir zot, pa bliye ki li finn ayir mwa avan.

¹⁹ Si zot ti viv pou lemond, lerla lemond ti pou konsider zot kouma so prop zanfan; me zot pa pou lemond; mwa, mo finn swazir zot, mo finn tir zot dan lemond. Akoz samem lemond ayir zot.

²⁰ Rapel parol ki mo finn dir zot, ‘Enn serviter pa pli gran ki so met.’ Si bann-la finn persekit mwa, bann-la pou persekit zot osi. Si bann-la swiv mo parol, bann-la pou swiv zot parol osi.

²¹ Me bann-la pou fer tousala parski zot ar mwa e parski bann-la pa konn Sa-Enn ki finn avoy mwa la.

²² Si mo pa ti vini e mo pa ti koz ar bann-la, zot pa ti pou ena pese me aster-la zot pena okenn exkiz pou zot pese.

²³ Dimounn ki ayir mwa, ayir mo Papa osi.

²⁴ Si mo pa ti fer pou zot, travay ki personn pa kapav fer, zot ti pou ena bon exkiz pou zot bann pese; me aster-la zot finn trouve e zot kontigne ayir mwa ek mo Papa.

²⁵ Tousala finn arive pou ki parol lalwa realize, ‘Zot pou ayir mwa san okenn rezon.’

²⁶ Kan Sa-Enn ki pou defann zot la pou vini, li pou donn so temwaniaz lor mwa. Li sorti kot mo Papa; mo pou avoy li e limem Lespri laverite.

²⁷ Zot osi zot pou donn zot temwaniaz parski depi koumansman zot avek mwa.”