Zn 13 - Nouvo Testaman Kreol Morisien Harmonisation NTPS KM

Zezi lav lipie so bann disip

¹ Avan fet Pak, kan Zezi trouve ki so ler finn vini pou kit sa later-la pou al rezwenn so Papa, kouma li ti kontan bann ki ti pe swiv li lor later, li kontign kontan zot ziska lafin.

² Letan zot ti pe pran zot repa, diab finn fini akapar lespri Zida, garson Simon Iskaryot, pou li vann Zezi.

³ Kouma li kone ki so Papa finn met tou dan so lame, ki li sorti kot Bondie e ki li pe retourn kot Bondie,

⁴ Zezi leve, kit latab, retir so manto, pran enn serviet e atas li dan so lerin.

⁵ Apre sa, li vers dilo dan enn kivet e li koumans lav lipie so bann disip; li souy zot lipie avek serviet ki ti dan so lerin.

⁶ Letan li ariv devan Simon Pier, Simon Pier dir, “Twa, Segner, to pou lav mo lipie?”

⁷ Zezi reponn, “To pa konpran seki mo pe fer aster-la me pli tar to ava konpran.”

⁸ Pier dir, “Pena sime to lav mo lipie.” Zezi reponn, “Si mo pa lav to lipie to pa pou partaz mo lavi.”

⁹ Simon Pier dir, “Segner, si koumsa, pa lav zis mo lipie me mo lame ek mo latet osi.”

¹⁰ Zezi dir, “Seki finn fini begne, pa neseser li begne ankor parski so lekor prop; li bizin lav zis so lipie. Zot, zot prop me pa zot tou selman.”

¹¹ (Zezi ti deza kone kisann-la ti pou vann li; akoz samem li dir, “Pa zot tou ki prop.”)

¹² Kan Zezi finn fini lav zot lipie, li remet so linz lor li e li repran so plas lor latab; apre li dir zot, “Eski zot konpran ki mo finn fer ar zot?

¹³ Zot abitie apel mwa ‘Met ek Segner.’ E zot ena rezon. Momem Met ek Segner.

¹⁴ Si mwa ki Met ek Segner, mo finn lav zot lipie, aster-la, zot osi zot bizin lav lipie zot kamarad.

¹⁵ Mo finn donn zot sa lexanp-la pou ki zot fer parey kouma mo finn fer ar zot.

¹⁶ Vremem, laverite mo dir zot, enn serviter pa pli gran ki so met e enn dimounn ki finn avoye pa pli gran ki dimounn ki finn avoy li la.

¹⁷ Si aster zot finn konn tousala, zot pou bienere si zot met sa an pratik.

¹⁸ Mo pa pe dir sa pou zot tou; mo konn bann seki mo finn swazir me fode ki Lekritir realize, ‘Seki finn manz mo dipin, finn kras dan mo lasiet.’

¹⁹ Mo dir zot tousala avan ki li arive, pou ki kan sa arive, zot krwar ki Mo-Mem-Mwa.

²⁰ Vremem, laverite mo dir zot, seki resevwar dimounn mo avoye, pe resevwar mwa e seki resevwar mwa, pe resevwar Sa-Enn ki finn avoy mwa la.”

Zezi anons so trayizon

²¹ Letan Zezi finn fini koze, li ti bien boulverse e li dir devan zot tou, “Vremem, laverite mo dir zot, enn parmi zot pou trayir mwa.”

²² Sakenn get so kamarad; zot res bet e zot pa kone pou kisann-la Zezi pe dir sa.

²³ Disip ki Zezi ti kontan la, ti pe asiz koste ar li.

²⁴ Simon Pier fer li enn sign pou ki Zezi dir li kisann-la sa.

²⁵ Lerla li vers so latet lor zepol Zezi e li demann li, “Segner, kisann-la sa?”

²⁶ Zezi reponn li, “Dimounn ki mo pou donn sa bout dipin ki mo tranp dan sa lasiet-la, limem sa.” Lerla Zezi tranp morso dipin-la, donn li Zida garson Simon Iskaryot.

²⁷ Kouma Zida pran dipin-la, Satan rant dan li. Lerla Zezi dir li, “Degaze al fer seki to ena pou fer enn fwa.”

²⁸ Me personn parmi bann dimounn ki ti atab, pa ti konpran ki fer Zezi finn dir sa.

²⁹ Ena ti krwar, kouma Zida ti kontrol finans, Zezi finn dir li, “Al aste seki nou bizin pou fet Pak ou bien donn kiksoz bann pov.”

³⁰ Kouma Zida pran sa bout dipin-la, li sorti, li ale. Ti fer nwar deor.

Nouvo komannman

³¹ Kouma Zida ale, Zezi dir, “Aster-la laglwar Garson Limanite finn manifeste e laglwar Bondie pou manifeste dan so Garson.

³² Si laglwar Bondie manifeste dan so Garson, alors Bondie pou manifeste dan limem laglwar Garson Limanite e Bondie pou glorifie li aster-la mem.

³³ Mo bann zanfan, mo pou avek zot pou enn tigit letan ankor; zot pou rod mwa me seki mo finn dir bann Zwif, mo pe dir zot li aster-la, ‘La kot mo pe ale, zot pa kapav vini.’

³⁴ Mo donn zot enn komannman nouvo: kontan zot kamarad, parey kouma mwa, mo kontan zot. Zot bizin kontan zot kamarad.

³⁵ Si zot ena lamour pou zot kamarad, tou dimounn pou kone ki zot mo disip.”

Zezi anons ki Pier pou renie li

³⁶ Simon Pier demande, “Segner, kot to pe ale?” Zezi reponn li, “La kot mo pe ale, to pa pou kapav swiv mwa aster-la, pli tar to pou swiv mwa.”

³⁷ Pier dir, “Segner, ki fer mo pa kapav swiv twa depi aster-la mem? Mo pare pou donn twa mo lavi.”

³⁸ Zezi reponn, “To pou donn to lavi pou mwa? Vremem, laverite mo dir twa, avan kok sante to pou finn fini renie mwa trwa fwa.”