Zn 12 - Nouvo Testaman Kreol Morisien Harmonisation NTPS KM

Marie vers parfin lor lipie Zezi

¹ Sis zour avan fet Pak, Zezi ti vinn Betani kot Lazar, limem ki Zezi finn resisite parmi bann mor.

² Zot ti invit Zezi pou dine; Mart ti pe servi e Lazar ti enn parmi bann invite ki ti pe asiz lor mem latab ar Zezi.

³ Marie pran enn flakon parfin ki ti fer ar enn plant bien rar e ki ti kout bien-bien ser; li vers parfin-la lor lipie Zezi, apre li souy li avek so seve. Lakaz-la net ranpli ek parfin-la.

⁴ Me Zida Iskaryot, enn parmi bann disip, (limem ki ti pre pou vann Zezi), dir

⁵ “Kifer pa ti vann sa parfin-la pou trwa-san pies larzan, koumsa ti kapav partaz kas-la avek bann dimounn pov?”

⁶ Li pa ti pe dir sa parski li ti kontan bann pov me parski li ti enn trianger; limem ti kontrol finans e li ti pran kas, met dan so pos.

⁷ Zezi dir, “Les sa fam-la trankil! Li finn montre seki li pou fer zour mo lanterman.

⁸ Bann pov, pou ena touzour parmi zot me mwa mo pa pou touzour ar zot.”

Enn konplo kont Lazar

⁹ Enn gran lafoul Zwif finn aprann ki Zezi ti la. Zot pa finn vini zis akoz Zezi me osi pou get Lazar ki Zezi ti resisite parmi bann mor.

¹⁰ Alors bann gran pret finn deside pou touy Lazar osi

¹¹ parski boukou parmi bann Zwif ti pe kit zot akoz Zezi, e zot ti pe met zot krwayans dan li.

Zot aklam Zezi dan Zerizalem

¹² Landime, enn gran lafoul ki ti vini pou fet Pak, finn tann dir ki Zezi pe vinn Zerizalem.

¹³ Lerla zot pran bann brans palmis e zot al akey li. Zot kriye, “Ozana, Bondie finn beni Sa-Enn ki pe vinn lor so nom la, limem lerwa Izrael.”

¹⁴ Zezi trouv enn ti-bourik, li asiz lor li. Kouma finn ekrir dan Lekritir,

¹⁵ “Pa gagn per, tifi Sion, ala to lerwa pe vini; li pe mont lor enn ti-bourik.”

¹⁶ Letan sa ti pase, so bann disip pa ti pe konpran me apre, kan Zezi finn glorifie, zot ti rapel seki Lekritir finn dir e seki dimounn ti fer pou li.

¹⁷ Lerla tou dimounn ki ti avek Zezi, rakont seki zot finn trouve kan Zezi ti kriy Lazar depi so tom e ti re-donn li lavi.

¹⁸ Akoz sa mirak-la, lafoul ti vinn zwenn Zezi.

¹⁹ Lerla bann Farizien dir ant zot, “Zot trouve, tou seki fer pa marse; gete, lemond pe galoup deryer li.”

Bann Grek rod Zezi

²⁰ Ti ena de-trwa Grek ki finn mont Zerizalem pou priye pou fet Pak.

²¹ Zot apros ar Filip ki ti res Betsaida, enn lavil dan Galile, e zot dir li, “Misie, nou anvi trouv Zezi.”

²² Filip al dir sa Andre e Andre ek Filip vinn dir sa Zezi.

²³ Zezi reponn zot, “Ler finn arive pou ki Garson Limanite glorifie.

²⁴ Vremem, laverite mo dir zot, si enn lagrin dible pa mor kan li tom dan later, li res tou sel, me si li mor li raport boukou fri.

²⁵ Seki kontan so lavi pou perdi li, seki pa atase ar so lavi dan lemond kot nou pe viv, pou gard li pou touletan.

²⁶ Si kikenn anvi servi mwa, fode li swiv mwa; la kot mo ete, mo serviter osi pou la; si kikenn servi mwa, mo Papa pou onor li.”

Bann-la pou lev Garson Limanite lao

²⁷ “Aster mo santi mwa boulverse; me ki mo pou dir, ‘Papa sap mwa ladan?’ Me akoz samem mo finn vini.”

²⁸ “Papa, glorifie to nom.” Lerla enn lavwa sorti dan lesiel, “Mo finn deza glorifie li e mo pou glorifie li ankor.”

²⁹ Lafoul ki ti prezan finn tande e zot dir, “Loraz sa!” Ena dir, “Enn anz finn koz ar li!”

³⁰ Me Zezi reponn, “Sa lavwa-la pa finn koze pou mwa me pou zot.

³¹ Aster-la mo pou ziz lemond e so gran sef pou deor.

³² E mwa, kan bann-la pou lev mwa lao depi lor later, mo pou atir tou dimounn ar mwa.”

³³ Li ti pe dir sa pou montre ki manier li ti pou mor.

³⁴ Lafoul pran laparol, “Dapre nou lalwa nou finn tande ki Lemesi zame pou mor; kouma to kapav dir bizin lev Garson Limanite lao? Kisann-la Garson Limanite?”

³⁵ Zezi dir zot, “Lalimier pou res ankor inpe letan avek zot; kontigne marse kan lalimier ankor ar zot, pou ki zot pa tom dan marenwar; parski dimounn ki mars dan nwar, pa kone kot li pe ale.

³⁶ Kan zot dan lalimier, krwar dan lalimier pou ki zot vinn bann zanfan lalimier.” Kan Zezi finn fini dir sa bann parol-la, li sorti e li al trankil dan enn kwin.

Bann Zwif pa krwar dan Zezi

³⁷ Malgre tou bann sign ki li finn fer devan zot, zot kontign pa krwar dan li.

³⁸ Tousala finn arive pou ki parol profet Izai akonpli, “Segner kisann-la finn krwar dan parol ki nou finn anonse? Kisann-la finn dekouver lafors Lesegner?”

³⁹ Zot pa ti pou kapav krwar parski Izai finn dir ankor,

⁴⁰ “Bondie finn rann zot lizie aveg, zot leker dir kouma ros, pou ki zot pa trouv kler avek zot lizie, pa konpran avek zot leker, lerla zot pa pou konverti e zot pa pou gagn zot gerizon.”

⁴¹ Izai finn koz lor Zezi parski li finn trouv so laglwar.

⁴² Malgre sa, boukou responsab krwar dan li; me akoz bann Farizien, zot pa ti les dimounn kone, pou pa met zot deor dan sinagog.

⁴³ Laverite, seki zot ti prefer plito laglwar lor later ki laglwar Bondie.

Zezi ziz lemond

⁴⁴ Zezi kriy for, “Dimounn ki krwar dan mwa, pa krwar zis dan mo tou sel me dan Sa-Enn ki finn avoy mwa la.

⁴⁵ Dimounn ki trouv mwa, trouv Sa-Enn ki finn avoy mwa la.

⁴⁶ Momem lalimier ki finn vinn dan lemond. Seki krwar dan mwa, pa pou res dan teneb.

⁴⁷ Si kikenn tann mo parol me pa gard zot, mo pa la pou zize. Mo pa finn vini pou kondann lemond me pou sov lemond.

⁴⁸ Seki rezet mwa e pa aksepte mo bann parol, finn fini pas zizman lor limem. Parol ki mo pe dir, samem pou ziz li dan dernie zour.

⁴⁹ Tou seki mo pe dir, pa sorti ar mwa me sorti kot mo Papa ki finn avoy mwa. Mo Papa finn komann mwa fer sa lansegnman-la.

⁵⁰ Mo kone ki so komannman donn lavi eternel; seki mo pe dir, samem mo Papa finn avoy mwa dir.”