Zn 10 - Nouvo Testaman Kreol Morisien Harmonisation NTPS KM

Parabol bon berze

¹ Zezi dir, “Vremem laverite mo dir zot, seki pa rant dan park mouton par laport me li sot miray, li enn voler, li enn bandi.

² Me seki pas par laport, limem berze bann mouton.

³ Gardien park ouver laport pou li: bann mouton tann lavwa berze letan li kriy sakenn par so nom e li fer zot sorti.

⁴ Kan li finn amenn tou so mouton deor, li mars devan zot, bann-la swiv li, parski zot konn so lavwa.

⁵ Zot pa pou swiv enn etranze; kan zot tann lavwa enn etranze zot sove parski zot pa konn lavwa lezot dimounn.”

⁶ Letan Zezi rakont zot sa parabol-la, zot pa ti konpran nanye lor seki li ti pe dir.

Zezi bon berze

⁷ Alors Zezi dir zot ankor, “Vremem laverite mo dir zot, momem laport bann mouton.

⁸ Tou bann seki finn vinn avan mwa, bann voler, bann bandi e bann mouton pa finn ekout zot.

⁹ Momem laport; seki pas par mwa, mo pou sov li, li pou kapav rantre sorti kouma li anvi e pou touzour ena patiraz pou li.

¹⁰ Voler vini zis pou kokin, touye ek detrir; mwa, mo finn vini pou zot gagn lavi, e pou ki zot gagn li an abondans.

¹¹ Momem bon berze; enn bon berze expoz so lavi pou so bann mouton.

¹² Dimounn ki travay zis pou kas pa enn berze; bann mouton-la pa pou li. Kan li trouv loulou vini, li kit mouton, li sove, li ale. Lerla loulou trap zot e farous zot.

¹³ Li sove parski li travay zis pou kas e li pa pran kont bann mouton.

¹⁴ Momem bon berze, mo konn mo brebi e mo brebi konn mwa.

¹⁵ Kouma mo papa konn mwa, e mwa mo konn mo papa, mo pare pou donn mo lavi pou mo bann brebi.

¹⁶ Mo ena lezot mouton ankor me zot pa ankor dan sa park-la; mo bizin al rod zot osi e zot pou ekout mo lavwa. Lerla pou ena enn sel troupo ek enn sel berze.

¹⁷ Akoz samem mo papa kontan mwa parski mo expoz mo lavi. Kan mo expoze, mo regagn lavi ankor.

¹⁸ Personn pa pran mo lavi; mo donn mo lavi par momem; mo ena pouvwar donn li, parey kouma mo ena pouvwar repran li. Mo finn resevwar sa pouvwar-la ar mo papa.”

¹⁹ Ankor enn fwa, ti ena divizion parmi bann Zwif, akoz so bann parol.

²⁰ Boukou parmi zot dir, “Ena enn demon lor li, li fou, ki fer zot ekout li?”

²¹ Enn lot bann dir, “Sa bann parol-la pa kapav sorti ar enn dimounn ki ena demon lor li; eski demon kapav ouver lizie aveg?”

Bann Zwif rezet Zezi

²² Ti fet Konsekrasion Tanp Zerizalem. Ti liver.

²³ Zezi ti dan Tanp e li ti pe ale-vini anba galri Salomon.

²⁴ Bann Zwif antour li e zot demann li, “Ziska kan to pou gard nou dan sispans? Dir nou enn fwa si tomem Lemesi?”

²⁵ Zezi reponn zot, “Mo finn deza dir zot, zot pale krwar mwa; bann travay ki mo fer lor nom mo Papa rann temwaniaz lor mwa,

²⁶ me zot pa krwar parski zot pa form parti mo bann brebi.

²⁷ Mo brebi tann mo lavwa, mo konn zot e zot swiv mwa.

²⁸ Mo donn zot lavi eternel, e zame zot pou mor. Personn pa pou kapav tir zot dan mo lame.

²⁹ Mo Papa ki finn donn mwa bann brebi-la, li pli gran ki tou e personn pa pou kapav ras zot dan lame mo Papa.

³⁰ Mo Papa ek mwa nou enn sel.”

³¹ Bann Zwif ramas ros ankor enn fwa pou avoy lor li.

³² Zezi reponn, “Mo finn montre zot boukou bon kiksoz ki mo Papa finn montre mwa fer, pou ki zafer zot anvi bat mwa kout ros?”

³³ Bann Zwif dir li, “Nou pa pe bat twa akoz enn bon kiksoz me parski to finn blasfeme: to enn zom kouma nou e to pran twa pou Bondie.”

³⁴ Zezi reponn zot, “Eski pa finn ekrir dan zot lalwa ki Bondie finn dir, ‘Zot bann bondie?’

³⁵ Si Bondie finn apel bondie bann seki finn resevwar Laparol (e kouma nou kone, nou pa kapav sanz sa Parol Lekritir-la),

³⁶ kouma zot kapav dir ki mo pe blasfeme parski mo finn dir ki mo Garson Bondie, alors ki mo papa finn swazir mwa e finn avoy mwa dan lemond?

³⁷ Si mo pa pe fer travay mo Papa, pa bizin krwar dan mwa,

³⁸ me si mo pe fer so travay, mem si zot pale krwar dan mwa, krwar omwin dan bann travay-la. Rekonet mo Papa e konpran ki li dan mwa, e mwa, mo dan li.”

³⁹ Ankor enn fwa, zot rod trap li me li sap dan zot lame, li ale.

⁴⁰ Zezi resot larivier Zourdin ankor pou al dan rezion kot Zan ti pe batize. Lerla li res laba mem.

⁴¹ Boukou dimounn vinn ar Zezi e zot dir, “Zan pa finn fer okenn mirak, pourtan tou seki li finn dir lor Zezi ti vre.”

⁴² Lerla boukou krwar dan Zezi dan sa landrwa-la.