Zn 1 - Nouvo Testaman Kreol Morisien Harmonisation NTPS KM

Koumansman Bonn Nouvel

¹ Dan koumansman ti ena Laparol, Laparol ti ar Bondie e Laparol ti Bondie.

² Dan koumansman li ti ar Bondie.

³ Tou finn kree par Laparol e tou seki finn existe, finn existe par li.

⁴ Limem ti lavi e lavi ti lalimier tou dimounn.

⁵ Lalimier ti ekler teneb, e teneb pa finn aret li.

⁶ Bondie ti avoy enn dimounn; li ti apel Zan.

⁷ Li ti vini kouma temwin pou donn so temwaniaz lor lalimier e pou ki tou dimounn krwar.

⁸ Li pa ti lalimier li, me li ti vini pou donn enn temwaniaz lor lalimier.

⁹ Veritab lalimier finn vinn dan lemond, li finn ekler tou dimounn.

¹⁰ Li ti dan lemond e lemond finn kree par li, selman lemond pa ti rekonet li.

¹¹ Li ti vinn kot li me so prop fami pa finn resevwar li.

¹² Li finn donn tou dimounn ki finn resevwar li e ki krwar dan so nom pouvwar pou vinn zanfan Bondie.

¹³ Zot pa vinn zanfan Bondie par nesans natirel, par volonte bann imin, par dezir enn papa ek enn mama, me zot finn pran nesans kot Bondie.

¹⁴ Laparol finn vinn enn imin e li finn res kot nou. Li ti ranpli ar lamour ek laverite. Nou finn kontanple so laglwar, laglwar sel Garson Bondie Papa.

¹⁵ Zan ti pe donn enn temwaniaz lor li e ti pe kriye, “Limem Sa-Enn lor ki mo ti pe dir, ‘Sa dimounn ki vinn apre mwa la, li ti la avan, parski li ti existe an-premie.’ ”

¹⁶ Nou tou finn resevwar benediksion enn lor lot ki sorti depi so grander infini.

¹⁷ Si par Moiz nou finn resevwar lalwa, par Zezi Kris nou finn resevwar enn lamour infini.

¹⁸ Zame personn finn trouv Bondie apar so sel Garson. Li ti enn sel ar so Papa. Limem finn fer nou konn Bondie.

Temwaniaz Zan Batis

¹⁹ Ala temwaniaz ki Zan finn donn bann pret ek bann Levit, kan bann Zwif Zerizalem ti avoy zot pou demann li, “Ki to ete, twa?”

²⁰ Li ti deklar anpiblik san kasiet nanye; wi, li finn dir an piblik, “Mo pa Lekris mwa.”

²¹ Alors zot demann li, “Kisann-la to ete? Tomem Eli?” Li reponn, “Non, pa mwa sa.” Tomem sa profet ki nou ti pe atann la? Li reponn, “Non.”

²² Zot dir li ankor, “Kisann-la to ete? Rann enn repons pou nou al inform bann dimounn ki finn avoy nou. Twa, ki to ena pou dir lor tomem?”

²³ Lerla li reponn, “Kouma profet Izai finn dir, ‘Momem lavwa ki pe kriye dan dezer, ouver enn sime drwat pou Lesegner.’ ”

²⁴ Sa bann dimounn ki bann Farizien ti avoye la

²⁵ kontign poz Zan kestion. Zot demann li, “Abe ki fer to pe batize si to pa ni Lekris, ni Eli, ni sa profet-la?”

²⁶ Zan reponn zot, “Mwa, mo batiz dan dilo me parmi zot ena kikenn ki zot pa kone.

²⁷ Li pe vinn apre mwa, e mo mem pa ase bon pou delarg so sandalet.”

²⁸ Tousala finn deroule dan Betani lot kote Zourdin, kot Zan ti pe batize.

Agno Bondie

²⁹ Landime, Zan trouv Zezi pe vini e li dir, “Get Agno Bondie ki tir pese lemond;

³⁰ Pou limem mo ti pe dir, ‘Apre mwa kikenn pe vini, li ti la avan parski li ti existe an premie.’

³¹ Momem mo pa ti konn li; mo finn vinn batiz dan dilo pou fer Izrael konn li.”

³² Zan ti pe donn so temwaniaz, li ti pe dir, “Mo finn trouv Lespri desann kouma enn kolonb ki sorti dan lesiel e res lao lor so latet.

³³ Mwa, mo pa ti konn li, me seki finn avoy mwa batiz dan dilo la, finn dir mwa, dimounn lor ki to pou trouv Lespri desann e res lao lor so latet, limem pou batiz ar Lespri Sin.

³⁴ Mwa mo finn trouve ar mo lizie e mo pe rann temwaniaz, limem Garson Bondie.”

Bann premie disip Zezi

³⁵ Landime, Zan ti pe debout ankor avek de so bann disip.

³⁶ So regar swiv Zezi ki pe pase; li dir, “Get Agno Bondie.”

³⁷ Kan so de disip finn tann sa, zot koumans swiv Zezi.

³⁸ Ler Zezi vire, li trouv zot pe swiv li; li demann zot: “Ki zot pe rode?” Zot dir, “Rabi, (seki vedir Met), kot to reste?”

³⁹ Zezi reponn zot, “Vini zot va trouve.” Zot finn ale, zot finn trouve kot li pe reste, zot res ar li sa zour-la. Ti anviron kat-r-er tanto.

⁴⁰ Andre, frer Simon Pier, ti enn parmi sa de disip ki ti tann Zan koze e ki finn swiv Zezi.

⁴¹ Andre finn koumans par al rod so frer Simon, e li dir li, “Nou finn trouv Lemesi,” (seki vedir Lekris).

⁴² Apre, li amenn Simon ar Zezi. Zezi get li fran dan so lizie e li dir li, “Twa, to apel Simon, garson Zan, aster-la to pou apel Kefas,” (seki vedir ros).

Zezi apel Filip ek Natanael

⁴³ Landime, Zezi desid pou al Galile. Ler li trouv Filip, li dir li, “Swiv mwa.”

⁴⁴ Parey kouma Andre ek Pier, Filip ti osi enn abitan lavil Betsaida.

⁴⁵ Filip al get Natanael e li dir li, “Nou finn trouv li, lor limem ki Moiz finn ekrir dan liv lalwa ek bann profet. Li apel Zezi, li garson Zozef e li sorti Nazaret.”

⁴⁶ Natanael dir li, “Eski kiksoz de bon kapav sorti Nazaret?” Filip dir li, “Vinn gete.”

⁴⁷ Ler Zezi trouv Natanael pe vini, li dir, “Sa enn vre Izraelit, sa. Pena defo dan li.”

⁴⁸ Natanael demann li, “Be kouma to konn mwa?” Zezi reponn li, “Avan mem ki Filip ti apel twa anba pie fig, mo ti finn fini trouv twa.”

⁴⁹ Natanael reponn, “Met, tomem Garson Bondie, Lerwa Izrael.”

⁵⁰ Zezi reponn li, “Parski mo finn dir twa ki mo finn trouv twa anba pie fig ki to krwar dan mwa? Abe to pou trouv kiksoz ankor pli gran.”

⁵¹ Li dir li, “Vremem, laverite mo dir zot, zot pou trouv lesiel ouver ek bann anz Bondie monte-desann lor Garson Limanite.”