Zistwar Bann Zapot 2 - Nouvo Testaman Kreol Morisien Harmonisation NTPS KM

Lespri Sin desann zour Lapantkot

¹ Kan zour Lapantkot ti arive, tou bann krwayan ti reini ansam dan mem landrwa.

² Enn sel kout enn son terib ti sorti depi lesiel parey kouma enn divan violan ki pe soufle, e sa ti ranpli lakaz kot zot ti reini.

³ Lerla zot ti trouv seki paret kouma bann ti laflam dan form lalang, ki separe ek repoz lor sakenn parmi bann krwayan.

⁴ Zot tou ti ranpli ar Lespri Sin e zot koumans koz dan lezot langaz dapre seki Lespri ti pe donn zot pou exprime.

⁵ Dan Zerizalem ti ena bann Zwif ki ti bien devwe pou Bondie, e ki ti sorti partou lor later.

⁶ Enn gran lafoul ti rasanble letan ti finn tann sa tapaz-la. Zot ti res bet parski sakenn ti tann bann krwayan pe koz dan langaz zot pei.

⁷ Dan zot etonnman ek admirasion zot koumans dimande, “Tou sa bann dimounn ki pe koze-la, pa bann Galileen?

⁸ Abe kouma sakenn parmi nou pe tann zot koz dan langaz nou prop pei?

⁹ Nou sorti pei Part, Medi ek Elam. Ena bann abitan Mezopotami, Zide e Kapados, ena sorti Pon ek provins Lazi,

¹⁰ Frizi e Panfili, Lezip ek rezion Sirenn dan Libi, ek ena ki vinn depi Rom,

¹¹ Kret ek Arabi; ena ki finn ne Zwif, ena ki finn konverti dan relizion Zwif, me pourtan nou tou tann zot pe rakont mervey Bondie sakenn dan nou bann langaz!”

¹² Zot ti telman etone e dan konfizion, ki zot ti pe dir ant zot, “Ki sa vedir, sa?”

¹³ Me lezot ti pe boufonn bann krwayan; zot ti pe dir, “Divin ki pe koze.”

Diskour Pier

¹⁴ Pier ti diboute avek lezot onz zapot e avek enn lavwa bien-bien for li ti koz ar lafoul, “Mo bann kamarad Zwif e zot tou ki abitan Zerizalem, les mo explik zot, ekout mo parol avek atansion.

¹⁵ Non, sa bann dimounn-la pa finn soule zot, li zis nef-er gramatin la.

¹⁶ Me seki profet Zoel ti anonse, samem ki pe realize aster-la:

¹⁷ ‘Ala seki pou arive dan dernie zour, Bondie dir, Mo pou repann mo Lespri lor tou dimounn. Zot garson, zot tifi pou anons mo mesaz; zot bann zenes pou trouv vizion, zot bann vie dimounn pou fer bann rev.

¹⁸ Wi, lor mo bann serviter, ki li zom ki li fam, mo pou vers mo Lespri sa zour-la; e zot pou profetize.

¹⁹ Mo pou fer bann mervey dan lesiel lao e bann sign mirak anba lor later, pou ena disan, dife, ek niaz lafime,

²⁰ soley pou rant dan marenwar, lalinn vinn disan avan ki zour Lesegner arive dan grander, dan laglwar.

²¹ Lerla, ninport ki dimounn ki kriye sekour Lesegner, li pou sove.’

²² Mo bann kamarad Izraelit, ekout seki mo ena pou dir zot: Zezi ki sorti Nazaret, ti enn dimounn ki ena lotorite Bondie, ki finn prouve devan zot par mirak, mervey ek sign, kouma zotmem zot kone.

²³ Dapre konesans ki Bondie ena davans, ek dapre so plan, sa zom-la finn livre dan zot lame, e zot finn touy li avek led bann move dimounn; zot finn krisifie li.

²⁴ Me Bondie finn resisit li, finn tir li dan douler lamor, parski li ti inposib ki lamor tini li dan so pouvwar.

²⁵ Ala seki David dir lor li: ‘Mo touletan trouv Lesegner devan mwa; Li pre ar mwa, koumsa mo pa tranble.

²⁶ Akoz sa mo ranpli ar boner, mo parol ranpli ar lazwa. Mo lekor pou repoz dan lesperans

²⁷ parski to pa pou abandonn mwa dan landrwa kot bann mor ale to pa pou les to serviter pouri dan tonbo.

²⁸ To finn montre mwa sime ki donn lavi, e to prezans ranpli mwa ar lazwa.’

²⁹ Mo bann kamarad Izraelit, mo kapav dir zot avek lasirans ki nou anset David ti mor e ti anter li. So tom ankor la avek nou zordi.

³⁰ Parski li ti enn profet, li ti kone ki Bondie ti promet li par enn serman ki enn zour enn so desandan pou asiz lor so tronn.

³¹ David ti trouve an avans seki Bondie pou fer enn zour, alor li ti koz lor rezireksion Lemesi letan li ti dir: ‘Pa ti abandonn li dan landrwa kot bann mor ale, e so lekor pa ti pouri dan tonbo.’

³² Bondie ti resisit Zezi depi lamor e nou bann temwin ki sa ti arive.

³³ Bondie ti plas li dan so kote drwat, e li finn resevwar promes Lespri Sin par so Papa; e Zezi finn repann seki zot pe trouve ek tande.

³⁴ David pa ti mont dan lesiel, me pourtan li ti dir: ‘Lesegner Bondie finn dir mo Segner: asiz la lor mo drwat,

³⁵ ziska ki mo fer to bann lennmi to marspie.’

³⁶ Tou lepep Izrael bizin kone avek lasirans: sa Zezi ki zot finn krisifie la, limem ki Bondie finn fer Segner e Mesi!”

Bann premie konverti

³⁷ Letan bann dimounn tann sa zot ti boulverse dan zot leker, zot dir Pier e lezot zapot, “Frer, ki nou bizin fer?”

³⁸ Pier reponn, “Repanti, e resevwar batem dan nom Zezi Kris pou zot gagn pardon pou zot pese; e zot pou resevwar don ki Bondie done, Lespri Sin.

³⁹ Sa promes-la li pou zot, zot zanfan, pou tou seki lwin e pou tou seki Lesegner nou Bondie pou apele.”

⁴⁰ Pier kontign ankouraz bann-la ar boukou lezot temwaniaz pou konvink zot; li dir zot, “Sov zotmem depi pinision ki pe vinn lor sa bann move dimounn ki dan perdision.”

⁴¹ Boukou seki finn krwar sa mesaz-la ti resevwar batem, e sa zour-la anviron trwa-mil dimounn ti azoute ar group bann krwayan.

Lavi premie kominote krwayan

⁴² Zot ti devwe zot letan pou ekout lansegnman bann zapot e kominion fraternel, zot ti partaz repa lakominion e lapriyer.

⁴³ Boukou mirak ek sign ti pe akonpli par bann zapot, e tou dimounn ti inpresione.

⁴⁴ Tou bann krwayan ti ini e ti pe partaz tou zot dibien ansam.

⁴⁵ Zot ti vann zot dibien e seki zot posede, pou zot distribie li dapre seki sakenn ti bizin.

⁴⁶ Zour apre zour zot ti rasanble kouma enn group dan Tanp, zot ti kas dipin ansam dan lakaz, e ti pran zot repa ansam avek enn leker sinser e ranpli ar lazwa.

⁴⁷ Zot ti loue Bondie e ti gagn lestim tou bann dimounn. Toulezour Lesegner ti pe sov dimounn ki li ti pe azout dan zot group.