Zistwar Bann Zapot 18 - Nouvo Testaman Kreol Morisien Harmonisation NTPS KM

Pol dan Korint

¹ Apre sa Pol kit Atenn e li al Korint.

² Laba li ti zwenn enn Zwif ki ti apel Akila, ki finn ne dan enn landrwa ki apel Pon. Li ti fek vinn Itali avek so madam Prisil, parski lanperer Klod ti donn lord tou bann Zwif pou kit Rom. Pol ti al get zot,

³ e parski li ti fer mem metie ki zot, li ti res kot zot pou travay ansam. Zot ti bann fabrikan latant.

⁴ Sak saba Pol ti pran laparol dan sinagog, li ti rod konvink bann Zwif ek bann Grek.

⁵ Kan Silas ek Timote ti vinn depi Masedwann, Pol ti devwe tou so letan zis pou pres laparol ek dir bann Zwif ki Zezi limem Lemesi.

⁶ Bann Zwif ti opoz Pol ek zot ti insilte li, lerla Pol sakouy so linz e li dir, “Si zot al dan perdision, zotmem antor! Mo pa responsab. Aster-la mo pou al kot bann payin.”

⁷ Lerla Pol kit sinagog e li al kot Tityis Zistis enn dimounn ki ti ador Bondie, ki so lakaz ti akote sinagog.

⁸ Krispis ki ti sef sinagog ek tou so fami ti krwar dan Lesegner. Boukou bann abitan Korint osi ki ti tann Pol prese, ti krwar ek zot ti batize.

⁹ Enn swar dan enn vizion Lesegner dir Pol, “Pa bizin gagn per, me kontign koze, napa res trankil;

¹⁰ parski mo ar twa e personn pa pou atak twa pou bles twa; ena boukou mo bann dimounn dan sa site-la.”

¹¹ Pol ti pas enn an sis-mwa dan Korint pou ansegn zot Parol Bondie.

¹² Me kan Galyon ti gouverner Akai bann Zwif ti marye-pike kont Pol ek zot ti amenn li devan lakour.

¹³ Zot dir koumsa, “Sa zom-la pe fer bann dimounn ador Bondie dan enn manier ki kont lalwa.”

¹⁴ Zis kouma Pol ti pou koze, Galyon dir bann Zwif, “Si sa ti enn ofans oubien enn krim orib mo ti pou ena enn rezon pou pran letan ekout zot, bann Zwif;

¹⁵ me parski sa zafer-la konsern bann parol ek bann nom, ek zot prop lalwa, debrouy zot; mo refiz ziz sa bann zafer-la.”

¹⁶ Li ranvway zot depi lakour.

¹⁷ Zot tou trap Sostenn, sef sinagog, zot bat li devan lakour. Me Galyon pa ti pran zot kont.

Pol retourn Antios

¹⁸ Pol ti kontign res Korint e apre li ti pran bato pou al Lasiri, akonpagne par Prisil ek Akila. Avan so depar Pol ti fer raz so latet dan enn lavil ki apel Sankre, parski li ti finn fer enn promes.

¹⁹ Letan zot ariv Efez, Pol kit Akila ek Prisil, li al dan sinagog kot li koumans diskit ar bann Zwif.

²⁰ Kan zot ti dir li res pli lontan, li ti refize,

²¹ me kan ti vinn moman pou dir orevwar, li dir zot, “Mo pou retourne si li dan volonte Bondie.” Lerla li pran bato li al Efez.

²² Letan li ti ariv Sezare, li ti monte pou al Zerizalem pou salie bann manb Legliz, avan ki li al Antios.

²³ Pol ti pas inpe letan Antios, lerla li ti al vizit diferan landrwa dan rezion Galasi ek Frizi, pou konsolid lafwa bann krwayan.

Apolos dan Efez ek Korint

²⁴ Enn Zwif ki ti apel Apolos, e ki sorti Aleksandri, ti vinn Efez. Li ti enn gran orater, e li ti ena enn gran konesans Lekritir.

²⁵ Li ti finn gagn instriksion konsernan Sime Lesegner, e li ti ena boukou lantouzias. Li ti ansegne ek anons laparol lor Zezi avek boukou presizion. Me selman li ti konn zis batem Zan.

²⁶ Li ti koumans koz avek boukou lasirans dan sinagog. Letan Prisil ek Akila ti tann li, zot finn invit li kot zot, lerla zot finn ansegn li sime Bondie dan enn fason pli korek.

²⁷ Letan Apolos ti le al Akai, bann frer ti ankouraz li e zot ti ekrir bann disip laba pou akeyir li bien. Kan li ariv laba, li ti enn gran sekour pou bann ki ti finn krwar par lagras Bondie.

²⁸ Li ti prezant bann argiman solid kont bann Zwif dan deba piblik, parski li ti prouve par Lekritir ki Zezi, limem Lekris.