Revelasion 9 - Nouvo Testaman Kreol Morisien Harmonisation NTPS KM

¹ Alor, sinkiem anz-la ti soufle so tronpet; mo ti trouv enn zetwal sorti dan lesiel tom lor later. Zot ti donn anz-la lakle pwi-san-fon.

² Zetwal-la ti ouver pwi-san-fon e enn lafime parey kouma lafime enn gran fourno ti sorti ladan. Soley ek latmosfer ti vinn nwar avek sa lafime-la.

³ Enn kantite sotrel ti sorti dan lafime-la e vinn lor later; zot ti gagn pouvwar parey kouma pouvwar bann skorpion lor later.

⁴ Finn dir zot pa detrir bann lerb ni okenn verdir ou zarb lor later. Zot ena drwa detrir zis bann dimounn ki pena sele Bondie lor zot fron.

⁵ Zot ena drwa tortir zot pandan sink mwa, me pa touy zot. Douler sa tortir-la li parey kouma douler kan enn skorpion pik enn dimounn.

⁶ E dan sa lepok-la dimounn ti pou rod lamor me pa pou trouv li; zot pou swete mor, me lamor pou refiz koste.

⁷ Bann sotrel ti parey kouma bann seval bien ekipe pou konba; lor zot latet ti ena koumadir dis kouronn an-or e zot figir ti parey kouma figir dimounn.

⁸ Zot seve parey kouma seve bann madam, e zot ledan parey kouma ledan bann lion;

⁹ e zot ti ena enn lakok lasie kouma enn kwiras lor zot e son zot lezel parey kouma saryo ki ti pe tire par seval ki ti pe al dan lager.

¹⁰ Zot ti ena lake avek pikir kouma bann skorpion. Zot pouvwar pou bles dimounn pandan sink mwa ti trouv dan zot lake.

¹¹ Kouma lerwa, zot ti ena enn anz destrikter; an Ebre ti apel zot Abadon e an Grek Apolyon.

¹² Premie maler ti pase. Ena ankor de lezot pou vini.

¹³ Apre, siziem anz-la soufle so tronpet. Lerla mo tann enn lavwa sorti dan kat kwin lotel an-or ki devan Bondie,

¹⁴ li ti dir sa siziem anz ki ti ena tronpet-la, “Larg sa kat anz ki ti ansene kot larivier Efrat la.”

¹⁵ Alor, kat anz-la finn libere. Zot ti finn fini pare pou ler, zour, mwa ek lane pou touy enn tier limanite.

¹⁶ Mo tann dir ti ena de san milion solda avek zot seval.

¹⁷ Ala kouma mo ti trouv zot dan mo vizion: bann solda ti met kwiras kouler dife, ble safir ek zonn souf; latet bann seval-la parey kouma latet lion e dan zot lagel dife, lafime ek souf ti pe sorti.

¹⁸ Enn tier limanite ti mor avek sa trwa fleo-la: dife, lafime ek souf ki sorti dan lagel bann seval.

¹⁹ Pouvwar bann seval-la sorti dan zot lagel ek dan zot lake; zot lake parey kouma serpan, zot ti ena latet ki zot ti servi pou bles lezot.

²⁰ Sa parti limanite ki ti reste la, zot pa ti mor par sa bann fleo-la; zot pa ti repanti e regret bann travay ki zot ti pe fer ar zot laenn e zot ti kontigne ador diab ek bann idol an-or, an-arzan, an-bronz, an-ros ek an-dibwa ki pa kapav ni trouve, ni tande, ni marse.

²¹ Sa bann zans-la pa ti repanti pou zot bann krim, mazik, pou zot bann aksion imoral ek zot bann vol.