Revelasion 7 - Nouvo Testaman Kreol Morisien Harmonisation NTPS KM

Pep Bondie

¹ Apre sa, mo trouv kat anz pe debout dan kat kwin later, zot pe bar bann kat divan pou ki okenn parmi zot pa soufle lor later, lor lamer oubien kont okenn zarb.

² Mo trouv enn lot anz monte, sorti kote soley leve. Li ti ena sele Bondie vivan e li ti kriy bien for ver sa kat anz ki ti finn resevwar pouvwar pou detrir later ek lamer la.

³ Li ti dir: “Pa bizin detrir ni later, ni lamer ou bann zarb, ziska nou fini mark bann serviter Bondie avek enn sele lor zot fron.”

⁴ E mo tann ki kantite bann ki ti finn resevwar sele ti ete: ti ena san karann-kat mil parmi tou bann tribi pep Izrael.

⁵ 12,000 ti sorti dan tribi Zida, 12,000 dan tribi Riben, 12,000 dan tribi Gad,

⁶ 12,000 dan tribi Aser, 12,000 dan tribi Neftali, 12000 dan tribi Manase,

⁷ 12,000 dan tribi Simeon, 12,000 dan tribi Levi, 12,000 dan tribi Isakar,

⁸ 12,000 dan tribi Zabilon, 12,000 dan tribi Zozef ek 12,000 dan tribi Benzamin.

Lafoul

⁹ Apre sa, mo gete e mo trouv enn gran lafoul ki personn pa kapav konte. Tousala ti bann dimounn ki ti sorti dan tou nasion, tribi, pep ek langaz e zot ti pe debout devan tronn ek devan Agno dan zot rob blan avek enn brans palmis dan zot lame.

¹⁰ Zot kriye bien for, “Zis Bondie ek Agno ki donn liberasion, zot ki pe asiz lor tronn.”

¹¹ E tou bann anz ki ti rasanble otour tronn, otour bann ansien ek sa kat kreatir vivan la, zot tom azenou devan tronn, zot figir kont later, e zot ador Bondie.

¹² Zot dir, “Amen! Louanz, laglwar, lasazes, rekonesans, loner, pwisans ek lafors pou Bondie pou touzour ek touzour, Amen”

¹³ Apre sa, enn parmi bann ansien adres mwa laparol, li dir, “Ki sann-la sa bann dimounn ki finn abiy an blan la, e kot zot sorti?”

¹⁴ Mo dir li, “Mo Segner, tomem ki kone.” Lerla li dir mwa, “Sa bann-la, zot finn travers dan enn gran persekision, zot finn lav zot rob e finn fer zot vinn blan dan disan Agno.

¹⁵ Akoz samem zot devan tronn Bondie e zot pe ador li lanwit-lizour dan so Tanp. Sa-Enn ki pe asiz lor tronn-la pou protez zot.

¹⁶ Zame zot pa pou gagn fin ou swaf ankor. Soley pa pou tap for lor zot e so bann reyon pa pou bril zot.

¹⁷ Parski Agno ki la omilie tronn, li pou zot berze e li pou gid zot kot lasours delo lavi e Bondie pou souy tou larm dan zot lizie.”