Revelasion 6 - Nouvo Testaman Kreol Morisien Harmonisation NTPS KM

Set sele

¹ Lerla mo ti trouv Agno ouver enn sa set sele-la, e mo tann enn parmi sa kat kreatir vivan la kriye ar lavwa loraz, “Vini”.

² Mo gete e mo trouv enn seval blan. Dimounn ki ti pe mont li la, ti ena enn ark; zot ti donn li enn kouronn; lerla li ti ale kouma enn vinker pou gagn ankor laviktwar.

³ Ler li ouver deziem sele, mo tann deziem kreatir vivan la kriye, “Vini!”

⁴ Lerla enn lot seval rouz vif sorti; dimounn ki ti pe mont li la, ti gagn permision pou fer retir lape lor later, koumsa dimounn pou masakre zot kamarad. Zot ti donn li enn gran lepe.

⁵ Ler li ti ouver trwaziem sele, mo tann trwaziem kreatir vivan kriye, “Vini!” Mo gete e mo trouv enn seval nwar; dimounn ki ti mont li la ena enn balans dan so lame.

⁶ Mo tann koumadir enn lavwa sorti kot sa kat kreatir vivan la; li ti dir, “Enn mezir dible pou enn denie e trwa mezir lorz pou enn denie, me delwil ek divin, pa touse.”

⁷ Ler li ouver katriem sele, mo tann katriem kreatir vivan la kriye, “Vini!”

⁸ Mo gete e mo trouv enn seval ver pal. Dimounn ki ti pe mont li la apel Lamor, e Ades ti pe swiv li. Ti donn zot lotorite lor enn kar later, pou touy avek lepe, lafaminn, lepidemi e par bann zanimo sovaz.

⁹ Ler li ti ouver sinkiem sele, mo trouv anba lotel, nam bann ki ti finn masakre akoz parol Bondie ek temwaniaz ki zot ti finn done.

¹⁰ Zot ti kriye bien for, “Segner tomem Met ki sin ek veritab. Komie letan li pou pran pou ziz bann abitan later e pran to revanz pou nou disan ki finn verse?”

¹¹ Alor sakenn ti gagn enn rob blan e ti dimann zot pou pran ankor pasians ziska ki konplet lalis zot bann kamarad serviter ki pou perdi lavi kouma zot.

¹² Ler li ti ouver siziem sele, mo gete e ti ena enn gran tranbleman-de-ter; soley ti vinn nwar koumadir linz dey, e laplenn linn ti vinn kouma disan.

¹³ Zetwal dan lesiel tom lor later parey kouma fri fig ver, ki finn gagn bate dan tanpet.

¹⁴ Lesiel disparet tigit-tigit kouma enn tapi ki pe anroule; tou bann montagn ek bann zil ti deplase depi kot zot ti ete.

¹⁵ Bann lerwa later, bann dimounn inportan, bann zeneral, bann ris, bann pwisan, tou dimounn, esklav ek dimounn lib, kasiet dan bann kavern ek dan lagrot lor montagn.

¹⁶ Zot dir ar montagn ek ros, “Tom lor nou, kasiet nou lwin ar sa dimounn ki pe asiz lor tronn-la, e lwin ar lakoler Agno.

¹⁷ Parski gran zour zot koler finn arive, e kisann-la pou kapav reziste?”