Revelasion 5 - Nouvo Testaman Kreol Morisien Harmonisation NTPS KM

Liv sele avek kat sele

¹ Dan lame drwat Sa-Enn ki ti pe asiz lor tronn-la, mo ti trouv enn liv dan form enn roulo. Ti finn ekrir de kote lor li e li ti ferme avek set sele.

² Mo ti trouv enn anz pwisan ki ti proklame avek enn lavwa for, “Kisann-la ki kapav kas sa bann sele-la e ouver liv-la?”

³ Me personn dan lesiel ni lor later ou anba later pena pouvwar pou ouver liv-la pou gete ki ena ladan.

⁴ E mo finn bien plore parski personn pa ti dign pou ouver liv-la pou get ladan.

⁵ Lerla enn parmi bann ansien ti dir mwa, “Pa plore! Ala lion tribi Zida, desandan David ki finn ranport laviktwar; li kapav kas sa set sele-la, e ouver liv-la.”

⁶ Lerla mo trouv enn Agno pe deboute ant tronn ek kat kreatir vivan la. Li ti parmi bann ansien, koumadir finn sakrifie li. Li ti ena set korn ek set lizie, ki ti set lespri Bondie ki ti finn anvwaye partou lor later.

⁷ Li ti ale e ti pran roulo ki ti dan lame sa dimounn ki ti pe asiz lor tronn la.

⁸ Ler li fini resevwar roulo-la, sa kat kreatir vivan la ek sa vennkat ansien-la prostern devan Agno-la; sakenn ti ena enn laarp ek enn bann koup dore ranpli ar parfin ki ti reprezant lapriyer bann krwayan.

⁹ Zot sant enn nouvo kantik: “To merit pran liv-la e kas so bann sele parski zot finn touy twa, e avek to disan, to finn raste pou Bondie, dimounn toutsort tribi, langaz, pei ek nasion.

¹⁰ To finn fer zot vinn enn rwayom ek enn bann pret pou Bondie, e zot pou regne lor later.”

¹¹ Mo ti get ankor e mo ti tann lavwa enn kantite anz otour tronn e otour bann kreatir vivan ek bann ansien. Zot ti la par milie e par milion.

¹² Zot ti pe dir bien for. “Agno imole, to dign pou resevwar pouvwar, rises, lasazes ek lafors, loner, laglwar ek louanz!”

¹³ Mo tann osi bann kreatir dan lesiel ek lor later, anba later ek dan lamer, kreatir liniver antie pe sante: “Pou Sa-Enn ki pe asiz lor tronn e pou Agno louanz, loner, laglwar, ek pwisans, pou touzour ek touzour!”

¹⁴ Sa kat kreatir vivan la ti dir, “Amen!” Lerla bann ansien tom azenou pou adore.