Revelasion 4 - Nouvo Testaman Kreol Morisien Harmonisation NTPS KM

Enn vizion lor seki pase dan lesiel

¹ Apre mo fer enn lot vizion. Mo trouv enn laport ouver dan lesiel. Premie lavwa ki mo ti tande la koz ar mwa kouma enn tronpet; li dir, “Monte, vinn isi, mo pou montre twa seki pou arive apre sa.”

² Lespri ti sezi mwa anplas, e mo trouv enn tronn dan lesiel avek enn kikenn asize lor la.

³ Li ti briye parey kouma bann pier presie, kwartz ek agat; e so lalimier ti for kouma enn larkansiel emrod otour tronn-la.

⁴ Otour tronn-la ena vennkat tronn avek vennkat ansien ki asize lor la. Zot ti finn abiye an blan e zot ti ena enn kouronn an-or lor zot latet.

⁵ Ti ena zekler, enn pake tapaz, kout toner e devan tronn-la set flanbo ti pe brile; samem set lespri Bondie.

⁶ Devan tronn-la ti ena koumadir enn lamer transparan parey kouma kristal. Omilie ek otour tronn-la ti ena kat kreatir vivan avek boukou lizie devan ek deryer.

⁷ Premie kreatir-la parey kouma enn lion, deziem-la parey kouma enn toro, trwaziem-la avek enn figir zom ek katriem-la parey kouma enn leg volan.

⁸ Sakenn sa kat kreatir vivan la ti ena sis lezel ranpli ar lizie andan ek otour li. Lanwit lizour, zot zame aret sante: “Sin, sin, sin limem Lesegner Bondie Toupwisan ki ti existe, ankor pe existe ek ki pe vini.”

⁹ Sak fwa ki bann kreatir vivan la selebre laglwar ek loner e remersi Sa-Enn ki asiz lor tronn e ki viv pou touletan la,

¹⁰ Sa vennkat ansien-la prostern devan li, zot ador li e zot zet zot kouronn devan li, zot sante:

¹¹ “Segner Bondie, to merit resevwar laglwar, ek loner ek pwisans parski tomem ki finn kree tou kitsoz, to ti anvi ki zot existe alor zot finn vinn realite.”