Revelasion 22 - Nouvo Testaman Kreol Morisien Harmonisation NTPS KM

Larivier ki donn lavi

¹ Apre sa, li montre mwa enn larivier delo lavi kler kouma kristal, ki pe desann depi kot tronn Bondie ek tronn Agno.

² Omilie laplas lavil, lor de kote larivier ena enn bann pie lavi avek zot douz kalite fri. Sak mwa zot donn zot fri ek zot fey servi pou geri lepep.

³ Pa pou ena malediksion ankor. Tronn Bondie ek tronn Agno, zot pou dan lavil e so bann serviter pou ador li.

⁴ Zot pou trouv so vizaz e so nom pou ekrir lor zot fron.

⁵ Nepli pou ena lanwit; personn pa pou bizin lalimier flanbo ou lalimier soley; Lesegner Bondie, limem pou zot lalimier, e zot pou regne pou touzour.

Zezi Kris pe vini

⁶ E li dir mwa, “Sa bann parol-la, zot vre ek sir. Lesegner Bondie ki inspir bann profet, finn avoy so anz-la pou montre so bann serviter seki pou arive biento.

⁷ Ala, mo pe vini biento. Bienere dimounn ki gard parol profet ki trouv dan sa liv-la.”

⁸ Mwa, Zan, mo finn tande e mo fin trouv sa bann kitsoz-la. E ler mo finn tann sa e trouv tousala, mo finn tom azenou pou ador anz ki finn montre mwa sa.

⁹ Me li dir mwa, “Fode pa ki to fer sa, mo enn serviter parey kouma twa, parey kouma to bann frer profet ek tou lezot ki gard parol sa liv-la. Bondie ki to bizin adore.”

¹⁰ Lerla li dir mwa, “Pa gard sekre bann parol profet ki trouv dan liv-la, parski letan pe aprose.

¹¹ Les bann ki move kontigne fer plis dimal, bann ki moralman koronpi kontign dan zot pouritir, e bann ki zis kontign pratik lazistis, e bann ki viv lavi sin kontign vinn pli sin.

¹² Ala mo pe vini biento. Mo pe amenn mo rekonpans ki mo pou donn zot tou pou seki zot finn fer.

¹³ Momem Alfa ek Omega, premie ek dernie, koumansman ek lafin.

¹⁴ Bienere dimounn ki lav so rob pou li gagn drwa manz fri pie lavi e rant dan lavil par so bann laport.

¹⁵ Me andeor lavil ena bann lisien ek bann sorsie, bann dimounn imoral, kriminel, bann adorater idol ek tou bann ki kontan e pratik mansonz.

¹⁶ “Mwa, Zezi, mo finn avoy mo anz kot bann Legliz ar sa temwaniaz-la: ‘Mo enn desandan David, zetwal ki briye gramatin.’ ”

¹⁷ Lespri ek nouvel marye dir, “Vini!” Dimounn ki tann sa, zot osi dir, “Vini!” Dimounn ki swaf bizin vini, dimounn ki anvi pran delo lavi, pran li gratis.

Konklizion

¹⁸ Mo pe averti zot tou ki tann parol profetik sa liv-la: si kikenn azout kitsoz dan sa liv-la, Bondie pou azout dan so lavi mem kantite fleo ki ena dan sa liv-la.

¹⁹ E si kikenn retir kitsoz dan sa bann parol profetik la, Bondie pou retir so bout dan pie lavi e dan lavil sint ki finn dekrir dan sa liv-la.

²⁰ Dimounn ki garanti ki tousala vre, dir, “Wi, mo pe vini biento!” Amen. Vini, Segner Zezi!

²¹ Lagras Segner Zezi res avek zot tou.